Մոսկվան ոչնչացրել է իր ողջ քիմիական զենքը շատ տարիներ առաջ․ Պեսկով

Մոսկվան ոչնչացրել է իր ողջ քիմիական զենքը շատ տարիներ առաջ և ակնկալում է, որ Վաշինգտոնը կանի նույնը, հայտարարել է ՌԴ նախագահի մամուլի քարտուղար Դմիտրի Պեսկովը: Այս առնչությամբ Պեսկովը կարծում է, որ Պետդեպարտամենտի կողմից Ռուսաստանին ուղղված նմանատիպ կոչերը զուրկ են տրամաբանությունից, գրում է «Կոմերսանտը»:

«Ռուսաստանը տարիներ առաջ հայտարարեց և վավերացրեց իր տարածքում գտնվող ողջ քիմիական զենքի ոչնչացումը: Ռուսաստանը լիովին կատարել է համապատասխան կոնվենցիայի դրույթները: Ռուսաստանը չունի քիմիական զենք», – ասել է  Պեսկովը մամլո ասուլիսի ժամանակ:

Պեսկովը հավելել է, որ Ռուսաստանը հուսով է, որ «ՌԴ որոշ գործընկերներ ևս կկատարեն այդ կոնվենցիայի դրույթները»։ «Դուք գիտեք, որ մի շարք պետություններ կան, որոնք իրենց տարածքներում ունեն քիմիական զենք, դրանց թվում է նաև ԱՄՆ-ը․․․ Եվ այս լույսի ներքո նման հայտարարությունները, իհարկե, բացարձակապես զուրկ են տրամաբանությունից, հիմնավորումներից ու ոչ այլ ինչ են, քան հետագայում Ռուսաստանի զսպանն ուղղված իրենց քաղաքականության անհաջող քողարկման փորձ»,- հայտարարել է Կրեմլի ներկայացուցիչը։

ԱՄՆ Պետդեպարտամենտը հայտարարել էր, որ Ռուսաստանը պետք է հայտարարի և ոչնչացնի իր ողջ քիմիական զենքը, հակառակ դեպքում Ալեքսեյ Նավալնիի թունավորման դեպքի առթիվ երաշխավորված կլինի պատժամիջոցների երկրորդ փուլը:

Հիշեցնենք, որ մարտի 2-ին ԱՄՆ-ն ու ԵՄ-ն պատժամիջոցներ են կիրառել ընդդեմ Ռուսաստանի՝ Ալեքսեյ Նավալնիի թունավորման պատճառով։ Ռուսաստանը մտադիր է պատասխանել պատժամիջոցներին։

Տաթև Ֆռանգյան