Էս արհավիրքը դուք եք բերել ԲԴԽ․ Բաբաջանյանը ԱԺ-ում ձայնագրություն ներկայացրեց. ՏԵՍԱՆՅՈՒԹ

«Պարոն Վարդազարյան, Դուք ուղղակի չգիտեք՝ ինչ «ղալաթ» եք բերել Ձեր գլխին նոյեմբերի 15-ի հայտարարությամբ»,- այս մասին ԱԺ նիստում դիմելով ԲԴԽ նախագահ Ռուբեն Վարդազարյանին՝ ասաց ԱԺ պատգամավոր Արման Բաբաջանյանը՝ հավելելով՝ եկել եք սատանի մայլեն քյանդրբազություն եք անում, ձեր պաշտպանողական հայտարարությունները կոպեկի արժեք չունեն:

Պատգամավորը  դիմելով իշխանական խմբակցությանը նշեց. «Էս արհավիրքը դուք եք բերել Բարձրագույն դատական խորհուրդ, ձեր իշխանության օրոք է նա նշանակվել, Վանեցյանի առաջադրմամբ:  Այսինքն՝ այս մարդու ոչ թե վաստակն է դատական համակարգում գործել, այլ նա Ս. Սարգսյանի և Ռ. Քոչարյանի ժամանակ «վնգստացող դատավոր» է եղել, և Վանեցյանի առաջարկով դուք դատական համակարգի գլխին եք բերել այս պատուհասը»:

Պատգամավորը ԲԴԽ նախագահին հարց ուղղելիս միացրեց ԱԱԾ տարածած տեսանյութից մի հատված, որում ընդդիմության ներկայացուցիչները խոսում են «վարչապետին խփելու» մասին:

Պատգամավորը հիշեցրեց, որ ընդդիմության ներկայացուցիչների միջև «վարչապետին խփելու» մասին խոսակցությունը եղել է նոյեմբերի 14-ին: «Մարտակոչը, որ արել եք նոյեմբերի 15-ին, ուղղակի կապ ունի այս մտադրության, այս շրջանակի՝ ձեր ընկերական շրջանակի հետ»,- ասաց Բաբաջանյանը՝ հավելելով, որ Վարդազարյանի տղան «Բաղրամյան պողոտայի ակտիվիստներից է»:

Պատգամավորը նշեց, որ հարց է առաջանում. «Կա՞ առահասարակ մի բան, որի համար հպարտ եք, որ եղել եք դատավոր, Կենտրոնի դատարանի նախագահ, և կարող եք համարել, որ Ձեր գործունեությունն ու կյանքը միայն հանուն Ձեզ չի անցել, վկայաբերել մի բան, որ կարող եք վկայաբերել որպես Ձեր ներդրում ՀՀ իրավունքի զարգացման մեջ»:

Վարդազարյանը, մեջբերելով օրենքներից և դատավորների էթիկայի կանոններից դրույթներ, նշեց, թե դրանք իրեն զսպում են, որ չպատասխանի համարժեք բառապաշարով:

Վարդազարյանը նաև ասաց, որ իր անձի նկատմամբ վիրավորական արտահայտություններն ունենալու են հետևանք՝ դիմելու է ԱԺ-ի խորհրդին կամ Էթիկայի հանձնաժողովին, որ Բաբաջանյանին ենթարկեն կարգապահական պատասխանատվության՝ օգտագործած բառապաշարի համար:

Վրդազարյանը նշեց, որ իր տղան երկու շաբաթ առաջ ողնաշարի ճողվածքով պառկած է եղել տանը, մի շաբաթ առաջ վիրահատվել է և այժմ հետհիվանդանոցային բուժում է ստանում տանը: «Ձեր պնդումը քայլ է փորձել վիրավորել, գոտկատեղից ներքև հարվածել և իմ ընտանիքի անդամներին ներքաշել այս խոսակցության մեջ: Նման վարքագիծը հարիր չէ ԱԺ պատգամավորին: Մեծ հաճույքով Ձեզ կպատասխանեի ձեր բառապաշարով կամ ավելի խիստ քննադատական մոտեցմամբ, բայց ավաղ, պարտավոր եմ մնալ կոռեկտության սահմաններում»,- նշեց ԲԴԽ նախագահը:

«Կուզենայի,որ կոռեկտության սահմաններում մնայիք նոյեմբերի 15-ին»,- հակադարձեց պատգամավորը:

Մանրամասները՝ տեսանյութում: