«Իմ քայլ»-ն ագրեսիվ է իմ նկատմամբ, բայց հրաժարական չեմ տալու. Ռուբեն Վարդազարյան. ՏԵՍԱՆՅՈՒԹ

Բարձրագույն դատական խորհրդի նախագահ Ռուբեն Վարդազարյանը հրաժարականի մտադրություն չունի: Վարդազարյանն այս մասին ասաց ԱԺ-ում լրագրողների հետ զրույցում:

Հարցին, թե արդյոք հրաժարականի մտադրություն ունի՞, նա ասաց. «Այդպիսի մտադրություն չունեմ»:

ԲԴԽ նախագահը, անդրադառնալով ԱԺ նիստերի դահլիճում իրեն ուղղված հարցերին, «Իմ քայլը»-ի պատգամավորների վերաբերմունքն իր նկատմամբ գնահատեց առնվազն ագրեսիվ, ինչի պատճառը չգիտի:

Անդրադառնալով Օնիկ Գասպարյանին ազատելու հետ կապված վարչապետի առաջարկության առնչությամբ նախագահ Արմեն Սարգսյանի քայլերին՝ Վարդազարյանն ասաց, որ դեռ կարծիք չունի, նույնիսկ ունենալու դեպքում երբևէ հանրային եղանակով այդ կարծիքը չի հայտնելու: Ինչ վերաբերում է ԳՇ-ի՝ վարչապետի հրաժարականի պահանջով հայտարարությանը, նա ասաց, որ քաղաքականության հետ առնչություն չունի, հետևաբար քաղաքական բնույթի հարցերին չի պատասխանի:

«Իսկ որպես ՀՀ քաղաքացի կարծում եմ կլոր սեղանի շուրջ նստելով և բանակցելով՝ կարելի է ցանկացած խնդիր, ցանկացած ճգնաժամ լուծել»:

Անդրադառնալով դիտարկմանը, որ վարչապետի կամ մեկ այլ անձի նկատմամբ մեկը մահափորձի կոչ է անում, սակայն չի կալանավորվում, իսկ մյուսն անում է ու կալանավորվում է, ինչը, թերևս, վկայում է ճգնաժամի մասին, Վարդազարյանը նշեց, որ ճգնաժամ չկա. «Եվ դատավորի կողմից կայացրած որոշմանը գնահատական տալու համար կա Վերաքննիչ դատարան, կա Վճռաբեկ դատարան, վերադաս դատավորները կարող են պատասխանել այդ հարցին՝ դատավորը ճիշտ է եղել, թե ոչ: Ո՛չ ես, ո՛չ լրագրողները, ո՛չ քաղաքական գործիչները, ո՛չ քաղհասարակությունն իրավասու չէ դատավորի կողմից կայացված որոշմանը տալ գնահատական»:

Անդրադառնալով դատավորների հայտարարագրերին, դատավորների կողմից հնարավոր կոռուպցիոն ռիսկերի վերաբերյալ հարցերին՝ ԲԴԽ նախագահը նշեց, որ եթե Կոռուպցիայի կանխարգելման հանձնաժողովը կոռուպցիոն ռիսկեր տեսնի և վարույթ հարուցի, ներկայացնի ԲԴԽ խորհուրդը, կպատասխանի այդ հարցին՝ կոռուպցիոն ռիսկ կա, թե ոչ:

Մանրամասները՝ տեսանյութում: