Քաղաքականություն
02.03.2021 | 12:53«Կա մի պարզ ճշմարտություն, երբ որ հրապարակում կանգնած ժողովուրդը միասնական վանկարկում է. «Նիկոլ վարչապետ», երբ որ միասնական լույսեր են վառում, այդ դեպքում ասել, որ ՔՊ-ն կազմակերպել է իր համակիրների տեղափոխումը և դա անվանել վարչական ռեսուրսի օգտագործում, անլուրջ է»,- այս մասին այսօր խորհրդարանում լրագրողների հետ զրույցում ասաց ԱԺ փոխնախագահ Ալեն Սիմոնյանը։
«Այո՛, կազմակերպվել է մարզերից ինչ-որ մարդկանց տեղափոխում, բայց դա անվանել վարչական ռեսուրսի կիրառում կլինի միայն այն պարագայում, երբ ԱԺ-ի կամ ՊՆ-ի, ոստիկանության ավտոբուսն ուղարկենք ՔՊ-ի համակիր բերելու», – ասաց Ալեն Սիմոնյանը՝ արձագանքելով դիտարկմանը, թե նախօրեին իշխանությունը հանրահավաքին մարդկանց բերելու համար վարչական ռեսուրս է կիրառել։
Սիմոնյանի խոսքով՝ իրականացրած բոլոր հարցումները, այդ թվում նաև ընդդիմության և անկախ կազմակերպությունների անցկացրած հարցումները, ցույց են տալիս, որ «Քաղաքացիական պայմանագիրը» և Նիկոլ Փաշինյանն ունեն տասնապատիկ ավելի մեծ վարկանիշ, քան ընդդիմության բոլորը միասին վերցրած։
Մանրամասները՝ տեսանյութում:
