Փաշինյանի թիմը երեկ ժպիտով, «դըմփ-դըմփ հու»-ով անցնում էր փողոցներով,որտեղ ամեն օր սև «լենտեր» են կապվում. Զոհրաբյան. ՏԵՍԱՆՅՈՒԹ

«Երեկ փարթի էր, այլ ձևակերպում չկա: Հայաստանի պատմության մեջ չի եղել նմանատիպ դեպք, երեկվա երթը համարում եմ՝ ոտքերով Եռաբլուրը տրորել»,- այս մասին լրագրողների հետ զրույցում ասաց «Բարգավաճ Հայաստան» խմբակցության պատգամավոր Նաիրա Զոհրաբյանը:

Նաիրա Զոհրաբյանի խոսքով՝ Նիկոլ Փաշինյանի երեկվա հանրահավաքն իր հերթական պարտությունն էր, նրա իշխանության տապալումը, որովհետև երեկ «քերելով»՝ կարողացել էր հրապարակում հավաքել 20-22 հազար մարդ, ապա հանրահավաքը վերածել էր «փարթիի»:

«Փաշինյանն ունի իրեն սատարող քաղաքական թիմ, ովքեր երեկ ժպիտներով, ծափողջույններով, «դըմ-դըմփ-հու»-ներով, «վուվուզել»-ներով, ուրախ-զվարթ անցնում էին Երևանի այն փողոցներով, որտեղ պատերազմից սկսած՝ մինչ այսօր սև լենտեր են կապվում՝ «Արմեն 18», «Նարեկ 20», «Լևոն 21»…, և մեր լավագույն տղաների նկարներն են կախված: Սգո լենտերի փողոցներով անցնելով՝ երեկ իրենք տոնում էին Արցախի հանձնումը»,- նշեց Զոհրաբյանը:

Պատգամավորի դիտարկմամբ՝ Նիկոլ Փաշինյանը, ով իր լրագրողական և պատգամավորական գործունեության ընթացքում ԱԺ ամբիոնը և իր թերթը մշտապես իրավացիորեն օգտագործել է իշխանությունների կողմից վարչական ռեսուրսի կիրառման դեմ և հայտարարում էր, որ հանրապետական բանդաները զավթել են բուհերը, երեկ արեց աննախադեպ քայլ… այդպիսի վարչական ռեսուրսի կիրառում Հայաստանի անկախության պատմության մեջ չի եղել:

Զոհրաբյանի խոսքով՝ երեկվա հանրահավաք-երթով Փաշինյանն ու իր աջակիցները փորձում էին ուժ ցույց տալ, բայց հերթական անգամ ցույց տվեցին իրենց թուլությունը, իրենց անզորությունը: Զոհրաբյանը նշեց, որ վարչական ռեսուրսի կիրառման բազում օրինակներ են իրեն հայտնի դարձել, բազմաթիվ նամակներ է ստացել, որ Լոռիում, Սյունիքի մարզպետարանում, Գյումրիի, Երևանի դպրոցներում ու հիվանդանոցներում բոլորին բռնի ուժով, աշխատանքից հեռացնելու սպառնալիքով պարտադրել են մասնակցել Հանրապետության հրապարակում տեղի ունեցած «Ալիևի պարադի շարունակությանը»:

«Միայն այն, ինչ կազմակերպեց Նիկոլը այս երկու օրերի ընթացքում՝ բռնի ուժով բերման ենթարկելով, վախեցնելով, նաև մամուլում տեղեկատվություն եղավ, որ կաշառելով մարդկանց, բերման ենթարկելով երեկ իր կազմակերպած Ալիև փարթի-շոուին, դա վկայում է մեկ բանի մասին՝ Նիկոլ Փաշինյանը ի զորու չէ անցկացնել ո՛չ անկախ և ազատ հանրաքվե, ո՛չ անկախ և ազատ ընտրություն:

Նիկոլ Փաշինյանը պիտի հեռանա, որպեսզի Հայաստանը կարողանա անցկացնել ազատ և արդար ընտրություն, հետո արդեն կլինե՞ն Սահմանադրական փոփոխություններ, թե՞ չեն լինի, դա արդեն կորոշի ժողովուրդը՝ նոր իշխանության հետ միասին»,- ասաց Զոհրաբյանը:

Մանրամասները՝ տեսանյութում: