Հասարակություն
01.03.2021 | 20:30
Մարտի 1-ը, ՄԱԿ-ի որոշմամբ, 2014 թ-ից սահմանվել է որպես Խտրականության անհանդուրժողականության համաշխարհային օր։ Այն նպատակ ունի հիշեցնելու բոլոր մարդկանց հավասարության և արժանապատիվ կյանքի իրավունքի մասին` անկախ նրանց սեռից, տարիքից, առողջական վիճակից, զբաղվածությունից, հաշմանդամությունից, թմրամիջոց գործածելուց, գենդերային ինքնությունից, էթնիկ կամ կրոնական պատկանելությունից, սեռական կողմնորոշումից, ռասայից, եկամտի չափից, «անկախ նրանից, թե ինչպիսին է նրա արտաքինը կամ ում է նա սիրում»։
Կոալիցիայի և անդամ կազմակերպությունների ու անհատ-անդամների գործունեությունը վկայում է, որ երկրում շարունակական են խտրականության դրսևորումները։ Ներպետական օրենսդրությամբ, սակայն, դեռևս սահմանված չէ «խտրականություն» հասկացությունը, իրավահավասարության մասին առանձին օրենք չկա, իսկ 2018 թ-ին շրջանառության մեջ դրված «Իրավահավասարության ապահովման մասին» օրենքի նախագիծը չի պարունակում համապարփակ և գործուն կարգավորումներ՝ խտրականության կանխարգելման և խախտված իրավունքների վերականգնման համար։
Կոալիցիան առաջնային է համարում հակախտրական միջավայր ձևավորելու, ինչպես նաև լիարժեք հակախտրական օրենսդրություն ունենալու ուղղությամբ ջանքեր գործադրելը և լիահույս է, որ ապագայում յուրաքանչյուր ոք ՀՀ-ում հնարավորություն կունենա ապրել խտրականությունից զերծ և իրավահավասար միջավայրում։ Աշխարհը գեղեցիկ է իր տարբերություններով և բազմազանությամբ, և որևէ մեկը չպետք է տուժի կամ պատժվի իր որևէ բնութագրիչի համար։
