Վարչապետը գլխատում է ԶՈւ-ն. դուրս է եկել իր կողմից ազգային հերոսի, գեներալի կոչում ստացած մարդկանց դեմ. Էդմոն Մարուքյան. ՏԵՍԱՆՅՈՒԹ

ԱԺ «Լուսավոր Հայաստան» խմբակցության ղեկավար Էդմոն Մարուքյանը համարում է, որ Հայաստանի իշխանությունները խաբել ու մանիպուլացրել են ժողովրդին ու միջազգային հանրությանը՝ ԶՈՒ ԳՇ գեներալների, գնդապետների, կորպուսների հրամանատարների հայտարարությունը որակելով որպես զինված հեղաշրջման փորձ։

«Միջազգային հանրությանն  են նաև ստել ու մանիպուլացրել, որ ստանան աջակցություն միջազգային հանրությունից։ Ուրեմն ռազմական հեղաշրջում նշանակում է, որ զինված ուժերը գնում են ու քաղաքացիական իշխանությունը վերցնում են իրենց ձեռքը, քաղաքացիական իշխանության ներկայացուցիչներին կալանավորում են և զորքեր են հանում փողոցներ։ Հայաստանի Հանրապետությունում անգամ դրա փորձ չի եղել։ Հայաստանի վարչապետը մանիպուլացնում է ԳՇ հայտարարությունը, որպեսզի ի շահ իրեն օգտագործի և փորձի այս իրավիճակում էլ որոշակի համախոհություն գտնի քաղաքացիների մոտ, ասի՝ զինված ուժերն ուզում են խլել ինձանից իշխանությունը, ես չեմ տալիս, եկեք ինձ պաշտպանեք»,-ԱԺ-ում ճեպազրույցի ժամանակ հայտարարեց ընդդիմադիր գործիչը։

Պատգամավորն ընդգծեց, որ պատասխանատու կերպով հայտարարում է, որ Զինված ուժերը հեղաշրջման փորձ չեն արել, և քրեորեն հետապնդելի արարք, տարր, հատկանիշ գոյություն չունի ԳՇ հայտարարության մեջ։

«Եթե լինեն այլ զարգացումներ, ես կտամ գնահատական։ Ես դեմ եմ զինված հեղաշրջմանը, հիմա էլ պնդում եմ, որ դրա փորձ չի էլ եղել։ Եթե զորքերը, տանկերը հանեին փողոց, դա կլիներ զինված հեղաշրջման փորձ»,- նշեց Մարուքյանը։

Թե ինչու է նման հայտարարություն հասունացել ԳՇ կողմից, Մարուքյանի կարծիքով պատճառը հետևյալն է. «Վարչապետը գլխատում է առանց այն էլ հարվածի տակ եղած Զինված ուժերը։ Զինված ուժերում չեն մնացել ու չկան թալանչի, կոռումպացված գեներալներ։  Վարչապետը դուրս է եկել իր կողմից ազգային հերոսի, գեներալի, գնդապետի կոչում տված մարդկանց դեմ»:

«Եթե նրանք վատն էին, չպետք է տայիր, եթե լավն են, տվել ես կոչումները, և հիմա փորձ ես անում գլխատել զինված ուժերը, նրանք ասում են՝ եղբա՛յր, մի՛ արա նման բան։ Ամեն ինստիտուտում պետք է լինի մեկը, որ ասի՝ ստոպ։ Մեկ տարի առաջ այս ինստիտուտում (ԱԺ-ում) առաջին ստոպը ես եմ ասել վարչապետին, երբ ասացի՝ դուք հայտարարեցիք, որ ովքեր կաջակցեն հանրաքվեին, ազգի նվիրյալներ են, իսկ ովքեր չաջակցեն դավաճաններ են, և ես կանգնեցի ու ասացի՝ ստոպ։ Զինված ուժերի այդ հայտարարությունը ստոպ է, ուղերձ է վարջապետին, որ արդեն հասել է սահմանագծին, կործանման է տանում»,- նշեց Մարուքյանը:

Նա նաև հայտարարեց, որ պատրաստ է միջնորդ դառնալ Նիկոլ Փաշինյանի ու զինվորականների հանդիպման համար, ինչպես նաև ընդդիմության ու իշխանության միջև, բայց գտնում է, որ իրավիճակը չի կարող հանգուցալուծվել այն պայմաններում, երբ երկրում չկան ո՛չ պաշտոնյաներ, ո՛չ էլ պետական ինստիտուտներ։

Մանրամասները՝ տեսանյութում: