ՅՈՒՆԻՍԵՖ-ի ղեկավարը ներկայացրել է՝ ինչպիսին կարող է լինել աշխարհը համավարակից հետո

ՄԱԿ-ի Մանկական հիմնադրամի ղեկավար (ՅՈՒՆԻՍԵՖ) Հենրիետա Ֆորը համաշխարհային հանրությանը դիմել է բաց նամակով, որում կոչ է անում բոլորին «ավելի լավ ապագա» պատկերացնել ու լուծել խնդիրները, որոնց սրությունն ակնհայտ դարձավ COVID-19-ի համավարակի պատճառով։

Ֆորն առաջարկել է 5 կարևորագույն ուղղություն՝ համավարակից հետո վերականգնման համար։

1․ Նախ՝ COVID-19-ի դեմ պայքարի համատեքստում հնարավորություն է առաջացել հանրության վստահությունը վերականգնել պատվաստանյութերի հանդեպ։

«Առանց պատվաստանյութի հանդեպ վստահության, դրանք դառնում են պարզապես թանկարժեք սրվակներ բժշկի սենյակում»,- նշել է Ֆորը։ Նա նաև հիշեցրել է երկիր մոլորակի բոլոր բնակիչներին առանց բացառության պատվաստանյութով ապահովելու անհրաժեշտության մասին։

2․ Երկրորդ, ըստ Ֆորի, համավարակի ու կարանտինի պայմաններում ակնհայտ է դարձել, որ միջազգային հանրությունը թերագնահատում է ռիսկերը, որոնք կապված են երեխաների ու դեռահասների հոգեկան հիվանդությունների հետ։ Նա կոչ է արել ապահովել բնակչության հոգեկան առողջության պաշտպանությունը և նշել, որ նման ծրագրերում ներդրումներ անելն անհրաժեշտություն է։

3․ Թվային մեկուսացումը հաղթահարելու հետ կապված Ֆորը մատնանշել է, թե ինչպես է համավարակային մեկուսացումը բացահայտել համացանցի հասանելիության անհավասարությունը: Երբ 2020 թվականի սկզբում բոլոր դպրոցները փակվում էին, աշխարհի դպրոցահասակ երեխաների 30 տոկոսն ի վիճակի չէր օգտվելու առցանց կրթական ծրագրերից։ Խոսքը այն նույն երեխաների մասին է, որոնց մի մասի համար որակյալ կրթության հասանելիությունը հազիվ թե հավանական է: Նամակը կոչ է անում վերաիմաստավորել կրթությունը, վերացնել թվային անջրպետը, որպեսզի թվային գործիքները խթան հանդիսանան կրթությունը վերաիմաստավորելու և դեպի ապագա քայլ անելու հարցերում:

4․ Կորոնավիրուսից տուժել են առաջին հերթի փոքրամասնությունների ներկայացուցիչները։ Այսպես, օրինակ, աֆրոամերիկացիները կազմում են ԱՄՆ բնակչության 13 տոկոսը, սակայն նրանց է բաժին ընկել այդ երկրում COVID-19-ից բոլոր մահվան դեպքերի 25 տոկոսը։ Հենրիետա Ֆորը կոչ է անում պայքարել խտրականության դեմ ու հանրության բոլոր շերտերին հավասար հնարավորություններ ընձեռել՝ անկախ սեռից, ռասայից  կամ կրոնական պատկանելությունից։

5․ «COVID-19-ը մեզ չսովորեցրեց, որ համամոլորակային խնդիրները պահանջում են համամոլորակային մասշտաբի լուծումներ»,- ասել է Ֆորը։ Նա ընդգծել է, որ մարդկությունը պետք է միմյանց տեղեկացնելով պայքարի կլիմայի փոփոխության դեմ։ Ֆորը կոչ է արել համավարակից հետո աշխարհը վերակառուցել «կանաչ» տնտեսության սկզբունքների համաձայն։

Տաթև Ֆռանգյան