30.06.2026 | 22:20
Էրդողանն արձագանքել է Իսրայելի կառավարության՝ Հայոց ցեղասպանության ճանաչման որոշմանը
Կառավարությունը Շուռնուխում նոր թաղամաս կառուցելու համար հատկացրեց 470 մլն դրամ․ ՏԵՍԱՆՅՈՒԹ
Տնտեսություն
18.02.2021 | 11:43
Դեռևս հունվարի կեսին վարչապետի հանձնարարությամբ մեկնել ենք Սյունիքի մարզ՝ Շուռնուխ համայնք, և կատարել նոր կառուցվող բնակարանների համար տարածքի ընտրություն: Այս մասին Կառավարության նիստում «Հայաստանի Հանրապետության 2021 թվականի պետական բյուջեի մասին» օրենքում վերաբաշխում և լրացում կատարելու մասին հարցի քննարկման ժամանակ տեղեկացրեց Քաղաքաշինության կոմիտեի նախագահ Արմեն Ղուլարյանը՝ հավելելով, որ արդեն կատարվել են նոր թաղամասի հատակագծման աշխատանքները:
«Փետրվարի սկզբին մեկնարկել են նշահարման և նոր թողամասի ճանապարհային ցանցի հողային աշխատանքները: Առաջիկայում կսկսվեն 13 նոր բնակելի տների տեղակապման և շինարարական աշխատանքները: Կկառուցվեն նաև անասնագոմեր, տները կցանկապատվեն»,- նշեց Ղուլարյանը:
Քաղաքաշինության կոմիտեի նախագահի խոսքով՝ առաջին փուլի աշխատանքները կավարտվեն մինչև տարեվերջ, թաղամասը կբնակեցվի: Ծրագիրն ամբողջությամբ կավարտվի 3 տարում:
«Առաջին փուլում նախատեսված է կառուցել 13 տուն ու ճանապարհն առանց ասֆալտապատման: Երկրորդ փուլով կկառուցվեն բոլոր ենթակառուցվածքները՝ 2022 թվականին, և երրորդ փուլով մտածում ենք, որ կարող է անհրաժեշտություն լինի հասարակական, արտադրական նշանակության որոշ կառույցներ հիմնել: Դրանք կլինեն 2022-2023 թվականներին: Առաջին երկու փուլերի գնահատականով՝ կկազմի մոտ 700 մլն դրամ»,- ընդգծեց Ղուլարյանը՝ ավելացնելով, որ այսօր ընդունվող կառավարության որոշմամբ նախատեսվում է պահուստային ֆոնդից 2021-ին Քաղաքաշինության կոմիտեին հատկացնել 470 մլն դրամ Շուռնուխում բնակելի թաղամաս կառուցելու նպատակով:
Մանրամասները՝ տեսանյութում:
