01.08.2026 | 19:54
«Ուժեղ Հայաստան» խմբակցության ղեկավար է ընտրվել Նարեկ Կարապետյանը, խմբակցության քարտուղար՝ Տիգրան Աբրահամյանը
«Սասնա ծռերի» գործը մոտեցավ ավարտին, Փաշինյանը հեռախոսով զրուցել է Պուտինի հետ․ Լուրեր
Քաղաքականություն
17.02.2021 | 20:46
«Սասնա ծռեր» խմբի տասն անդամի գործով դատական նիստը մոտեցավ ավարտին։ ՊՊԾ գնդի գրավման գործով այսօր դատարանը հեռացավ խորհրդակցական սենյակ՝ որոշում կայացնելու։ Դատավոր Մեսրոպ Մակյանը որոշումը կհրապարակի փետրվարի 24-ին։ Գործով դատախազը խմբի անդամների մեծ մասի համար պահանջել է 8-9 տարվա, Արմեն Բիլյանի համար 21 տարվա, Սմբատ Բարսեղյանի համար ցմահ ազատազրկում։
—
Վարչապետ Նիկոլ Փաշինյանը հեռախոսազրույց է ունեցել Ռուսաստանի Դաշնության նախագահ Վլադիմիր Պուտինի հետ: Ընդգծվել է ռազմագերիների, պատանդների և պահվող այլ անձանց շուտափույթ վերադարձի կարևորությունը: Հայկական կողմը մտահոգություն է հայտնել, որ Ադրբեջանը լիարժեք չի կատարում համատեղ հայտարարության տվյալ կետի պահանջները:
—
Նախագահ Արմեն Սարգսյանն այսօր ընդունել է Միացյալ Թագավորության արտաքին գործերի, համագործակցության և զարգացման նախարարության Եվրոպական հարևանության և Ամերիկայի հարցերով նախարար Ուենդի Մորթընին: Քննարկման ընթացքում նախագահ Սարգսյանն առանցքային է համարել Ադրբեջանի կողմից հայ ռազմագերիների և քաղաքացիական անձանց շուտափույթ վերադարձի հարցը:
—
Եղեգնաձորի ոստիկանները Արենու խաչմերուկից բերման են ենթարկել երկու տղամարդու։ Զննությամբ նրանց ավտոմեքենայի բեռնախցիկից ու սրահից հայտնաբերվել են մետաղական տարաներով գնդացրի 1309 փամփուշտ և պահածոյացված սննդի 240 տարա, որոնք նախատեսված էին պաշտպանության նախարարության կարիքների համար։
