«ԱԱԾ սպան մտավ տուն և մեզ դուրս հանեց». ինչ են պատմում Սյունիքում աշխատած լրագրողները. ՏԵՍԱՆՅՈՒԹ

Սյունիքի մարզի սահմանապահ բնակավայրերում, առանց Ազգային անվտանգության ծառայության գիտության, լրագրողներն այլևս չեն կարող տեսանկարահանում իրականացնել: Թշնամու զինծառայողներից հինգ-տասը մետր հեռավորության վրա բնակվող շուռնուխցու առօրյա խնդիրները լուսաբանելու համար լրագրողները պետք է գրավոր դիմեն ԱԱԾ, սպասեն հինգ աշխատանքային օր, ստանան իրավապահ կառույցի համաձայնությունը և նոր միայն լուսաբանեն, օրինակ, Շուռնուխի բնակչի այն խնդիրը, որ նա նոյեմբերի 9-ի եռակողմ հայտարարության ստորագրման արդյունքում մնացել է անտուն:

Սյունեցի լրագրող Անուշ Միրզոյանն ասում է՝ գրեթե չկա օր, որ անհրաժեշտություն չլինի զինված թշնամուց տասը մետր այս կողմ գտնվող Շուռնուխի բնակչի հոգսերը լուսաբանել: Լրագրողին ԱԱԾ սահմանապահներն ասել են՝ ընտանեկան միջոցառումները նկարելուց և ֆեյսբուքում տեղադրելուց առաջ ևս անհրաժեշտ է ԱԱԾ-ի համաձայնությունը:

Սյունիքի մարզի սահմանային տարածքներում տարբեր թեմաներ լուսաբանելու համար ԱԱԾ-ի համաձայնությունն ունենալու՝ սահմանապահ զորքերի պահանջը «Իրազեկ քաղաքացիների միավորում» ՀԿ ծրագրերի համակարգող Դանիել Իոաննիսյանն անօրինական է համարում:

Ռազմական դրություն հայտարարելու մասին Կառավարության որոշմամբ  առկա սահմանափակումների կետը դեկտեմբերի 2-ին ուժը կորցրել է: Իոաննիսյանն ասում է՝ Սահմանադրության 42-րդ և 51-րդ հոդվածները երաշխավորում են կարծիք արտահայտելու ազատությունն ու տեղեկատվություն ստանալու իրավունքը: Նա շեշտում է՝ որևէ օրենքով նախատեսված չէ, որ սահմանամերձ համայնքներում լրագրողի աշխատանքի համար ԱԱԾ-ից թույլտվություն է պետք:

Լրագրող Արման Ղարիբյանը Factor TV-ի հետ զրույցում ասաց՝ ԱԱԾ-ի սահմանափակումները դեռ նախորդ շաբաթվանից են սկսվել: Նշենք, սակայն, որ ԱԱԾ-ն միայն երեկ է համապատասխան հայտարարությունը տարածել: Արման Ղարիբյանը վստահեցնում է՝ Սյունիքի սահմանամերձ գյուղերում ֆրանսիական լրատվամիջոցի լրագրողի հետ նախորդ շաբաթ նկարահանումներ է իրականացրել բնակչի տանը, իսկ ԱԱԾ-ն եկել և դուրս է հրավիրել իրենց:

Երեկ տարածված հաղորդագրությունը պարզաբանելու նպատակով ԱԱԾ-ն այսօր ևս մեկ հայտարարություն տարածեց: Ըստ դրա՝ Սյունիքում լուսաբանման վերաբերյալ իրազեկումը չունի լրատվամիջոցների գործունեությունը խոչընդոտելու նպատակ: ԱԱԾ-ից նշում են՝ հիշյալ իրազեկման նպատակն ընդամենը անհրաժեշտ նկարահանումներն աշխատանքային կարգով և նախապես փոխհամաձայնեցված կերպով կազմակերպելն է՝ պայմանավորված ստեղծված օպերատիվ իրավիճակով, անվտանգության նկատառումներով և տեղում իրականացվող որոշակի աշխատանքներով:

Ինֆորմացիայի ազատության կենտրոնի ղեկավար Շուշան Դոյդոյանը նշում է՝ այսօրվա պարզաբանմամբ ԱԱԾ-ն ևս մեկ անգամ տեղեկացնում է, որ նկարահանումներից առաջ պետք է պարտադիր անվտանգության մարմինների համաձայնությունն ունենալ:

Դոյդոյանն ասում է՝ ԱԱԾ-ի հայտարարությունները մի շարք հարցեր են առաջացնում, որոնց պատասխաններն իրավապահ կառույցը չի տալիս: Նա նաև չի բացառում, որ այսօրինակ սահմանափակումների կիրառումը արտաքին պարտադրված որոշում է:

Ի դեպ՝ ԱԱԾ-ի հայտարարության մեջ կան հստակություն չպարունակող ձևակերպումներ: Օրինակ՝ երեկ տարածված հաղորդագրության մեջ նշված է՝ «հիմք ընդունելով Սյունիքի մարզի համապատասխան տարածքներում սահմանային աշխատանքների իրականացման հանգամանքը՝ տվյալ վայրերում տարբեր թեմաներ լուսաբանելու նպատակով անհրաժեշտ է ունենալ ԱԱԾ-ի համաձայնությունը», սակայն, հստակեցված չէ, թե որոնք են այդ տարածքները: Դանիել Իոաննիսյանը Factor TV-ին փոխանցեց, որ հասարակական կազմակերպությունները քննարկում են ԱԱԾ-ի այս անօրինական որոշումը դատարանում վիճարկելու հարցը:

Մանրամասները՝ տեսանյութում։

Նարեկ Կիրակոսյան