Փաշինյանը հանդիպել է Արայիկ Հարությունյանի հետ, Արշակյանը բացատրել է՝ ինչու Բայրաքթար չունենք․ Լուրեր

Արցախում իրականացվելիք խոշոր ենթակառուցվածքային նախագծերի իրականացման վերաբերյալ տեղի է ունեցել խորհրդակցություն վարչապետ Նիկոլ Փաշինյանի ու Արցախի նախագահ Արայիկ Հարությունյանի գլխավորությամբ: Հայտնել է վարչապետի խոսնակ Մանե Գևորգյանը։ Նախանշվել են առաջիկա ծրագրերը, դրանց ուղղվելիք ֆինանսական հատկացումները և հետագա քայլերը:

—

ՀՀ-ն մեկ տարի է՝ գտնվում է ճգնաժամային կառավարման վիճակում: Այս մասին վարչապետ Նիկոլ Փաշինյանը հիշեցրել է Էկոնոմիկայի նախարարությունում անցկացրած խորհրդակցության ժամանակ։ Նա նշել է, որ եվրապարտատոմսերը թողարկվել են ամենացածր տոկոսադրույքով, ինչը նշանակում է, որ Ներդրողները հավատում են Հայաստանի քաղաքական ապագային

—

Պետք է հասկանանք՝ թուրքական «Բայրաքթարը» քանի տարում, ինչ ֆինանսավորմամբ է ստեղծվել, հրաշքի չսպասենք։ Այս մասին այսօրվա ամփոփիչ ասուլիսին ասել է ԲՏԱ նախարար Հակոբ Արշակյանը։ Նա նշել է, որ հայկական արտադրողները ներկայացրել են հետախուսական անօդաչուներ, որոնք կիրառվել են պատերազմի ժամանակ և դրական արձագանք են ստացել զինված ուժերից։

Խոսելով ԲՏԱ ոլորտից՝ նախարարը ասել է, որ ոլորտի մաքուր աշխատավարձը միջինում 580 հազարից բարձր է, և կոչ է արել, որ մարդիկ տեղափոխվեն այդ ոլորտ աշխատանքի

—

Երևանի ավագանու այսօրվա նիստում ներկայացված նախագծերից մեկով նախատեսվում է 2 մլրդ դրամ ուղղել մանկապարտեզների վերանորոգմանը։

Նույն նիստի ժամանակ «Իմ քայլը» խմբակցության քարտուղար Հասմիկ Խաչունցը հրաժարվել է քարտուղարի իր պարտականություններից, նրան կփոխարինի ավագանու մեկ այլ անդամ՝ Արմեն Գալջյանը։ Վերջինս Նիկոլ Փաշինյանի պատգամավորության տարիներին նրա օգնականն էր խորհրդարանում, իսկ այժմ պատգամավոր Հայկ Գևորգյանի օգնականն է։