Տրանսպորտային միջանցքների և երկաթուղու քարտեզը, որի շուրջ համաձայնության են եկել եռակողմ հանդիպմանը․ Կոմերսանտ

Ռուսական «Կոմերսանտը» հրապարակել է տրանսպորտային միջանցքների և երկաթուղու քարտեզը, որոնց շուրջ համաձայնության են եկել Հայաստանը, Ռուսաստանն ու Ադրբեջանը:

Հոդվածում նշվում է, որ Մոսկվայում ստորագրված փաստաթուղթը, կարծես թե, պետք է շահեկան լիներ բոլոր երեք կողմերի համար․ Ադրբեջանին անհրաժեշտ է ճանապարհ դեպի Նախիջևան և Թուրքիա, Ռուսաստանին՝ Թուրքիա ու Հայաստան, իսկ Հայաստանին՝ Ռուսաստան ու Իրան։ «Սակայն դե-ֆակտո բանակցությունների արդյունքում իրեն հաղթող էր զգում միայն Իլհամ Ալիևը։ Իսկ ահա Նիկոլ Փաշինյանը իր խոսքում կենտրոնացավ ոչ թե ձեռքբերումների, այլ չլուծված հարցերի վրա և առաջին հերթին Լեռնային Ղարաբաղի կարգավիճակի շուրջ քննարկումներից Բաքվի հրաժարվելու ու ռազմագերիների ճակատագրի վրա»,- գրում է լրատվականը։

Մինչ դեռ, Carnegie Europe կենտրոնի ավագ գիտաշխատող ու Լեռնային Ղարաբաղի մասին պատմական գլխավոր գրքերից մեկի՝ «Սև այգիի» հեղինակ Թոմաս դե Վաալը կարծում է, որ երեք երկրների բանակցությունների «ամենահետաքրքիր մասը մնացել է փակ դռների հետևում», իսկ տնտեսական օրակարգը բերվել է առաջին պլան՝ միայն ինչ-որ արդյունք ներկայացնելու համար։

«Փաշինյանն անկասկած, ցանկանում էր հասնել գերիների ու անհետ կորածների մասին համաձայնության, սակայն Ալիևը դրանում դեռևս շահագրգռված չէ։ Ալիևը, ամենայն հավանակությամբ, դժգոհ է խաղաղապահ առաքելության աշխատանքներից, սակայն Պուտինին այս հարցում փոխզիջումների պատրաստ չէ։ Ի՞նչ է մնում։  Տրանսպորտային ու երկաթգծային ճանապարհների վերականգնման անկեղծ ու ընդհանուր շահագրգռվածություն»,- «Կոմերսանտին» կարծիք է հայտնել փորձագետը։

Սակայն դե Վաալը նշում է, որ այս ծրագիրը պետք է համարել երկարաժամկետ․ այն իրականացնելու համար անհրաժեշտ է ոչ միայն ենթակառուցվածք, այլ նաև «քաղաքական կամք և հիմնարար համաձայնագրեր, որոնք ներկայումս բացակայում են»:

Տաթև Ֆռանգյան