«ԵՄ-ից հազիվ թե լինեն նկատելի ներդրումներ, եթե կոռուպցիան իր պատասխանը հստակ չստանա». Պյոտր Սվիտալսկի

«ԵՄ-Հայաստան հարաբերությունները և հեռանկարները» թեմայով` Գլոբալիզացիայի և տարածաշրջանային համագործակցության վերլուծական կենտրոնի նախաձեռնած քննարկմանը ելույթով հանդես եկավ ՀՀ-ում ԵՄ դեսպան Պյոտր Սվիտալսկին:

Դեսպանն անդրադարձավ Հայաստան-ԵՄ հարաբերություններին` ընդգծելով, որ դեռ նախորդ տարվանից ՀՀ քաղաքական շրջանակներից հավաստիացումներ են հնչել, որ Հայաստանն «այլ ձևաչափով նպատակ ունի ԵՄ-ի հետ համագործակցելու»:

Պյոտր Սվիտալսկին ներկայացրեց ԵՄ առաջնահերթությունները Հայաստանի հետ հետագա հարաբերությունների զարգացման համար. «Դատական իշխանությունների անկախություն, կոռուպցիայի դեմ պայքար, խտրականության մերժում, ինչպես նաև երկրում ժողովրդավարության ինստիտուտների զարգացում: Սրանք շատ կարևոր են ոչ միայն մարդու իրավունքների պաշտպանության, այլև տնտեսական բարեփոխումների առումով. ԵՄ-ից հազիվ թե լինեն նկատելի ներդրումներ, եթե կոռուպցիան իր պատասխանը հստակ չստանա, և եթե խոսում ենք պատշաճ կառավարման մասին, կոռուպցիայի դեմ պայքարը շատ կարևոր է»:

Տնտեսական ներդրումների և զարգացման փոխնախարար Գարեգին Մելքոնյանն անդրադարձավ «Շրջանակային համաձայնագրի» նախաստորագրմանը։ «ՀՀ-Եմ երկկողմ հարաբերությունների մասով ուզում եմ ասել, որ ավելի քան 20 տարվա պատմություն ունի ՀՀ-ԵՄ հարաբերությունները, երկուստեք ցանկություն կա համագործակցությունը թարմացնելու, ուստի Շրջանակային համաձայնագիրը դրանցից մեկն է: Նախաստորագրումից հետո անհրաժեշտ գոծընթացներ են ընթանում, նոյեմբերին պատրաստ կլինի ստորագրման»,- ասաց փոխնախարարը:

Վեցերորդ գումարման խորհրդարանի պատգամավոր Էդմոն Մարուքյանն էլ անդրադարձավ այն խնդրին, որ ԵՄ-ի ջատագովներն այլևս չեն խոսում համագործակցության մասին: Պատգամավորը հիշեցրեց, որ խորհրդարանում պատգամավորներից մեկը եկույթով է հանդես եկել` հայտարարելով, որ Հայաստանն այլընտրանք չի ունեցել այլ միության մաս դառնալու, բացի ԵԱՏՄ-ից:

Մարուքյանը շեշտեց, որ իր համար շատ կարևոր է այն տնտեսական ու իրավական աուրան, որ կարող էր լինել ՀՀ-ում` ԵՄ մաս դառնալուց հետո: «Դրա արդյունքում կարվեին նեդրումներ, ինչի հնարավորությունը չկա ԵԱՏՄ-ին անդամակցութամբ պայմանավորված և հետո մեկուսացված չէինք լինի այլ միություններից, ինչպես հիմա»,- ասաց պատգամավորը:

Սեդա Ղուկասյան