Արցախի պետնախարարը՝ ավիահաղորդակցության վերականգնման, ռուսական պատվաստանյութի հնարավոր կիրառման մասին

Լեռնային Ղարաբաղում ավիահաղորդակցության վերականգնումը մեծապես կնպաստեր խաղաղ կյանքի վերականգնմանը՝ հաշվի առնելով այն, որ այսօր Արցախն արտաքին աշխարհին կապող միայն մեկ ճանապարհ կա։ ՌԻԱ Նովոստիի հետ զրույցում նման կարծիք է հայտնել Արցախի պետնախարար Գրիգորի Մարտիրոսյանը՝ պատասխանելով օդանավակայանի հնարավոր բացման մասին հարցին։

«Դա մեծապես կնպաստեր խաղաղ կյանքի վերականգնմանը՝ հաշվի առնելով այն, որ այսօր Արցախն արտաքին աշխարհին կապող միայն մեկ ճանապարհ կա։ Այն բավականին բարդ վիճակում է, այդ պատճառով էլ ավիահաղորդակցության վերականգնումը դրական դերակատարում կունենար հանրապետության բնակչության համար՝ վաղվա օրվա հանդեպ կայունության ու վստահության ապահովման հարցում։ Այսօրվա դրությամբ, դեռևս լիարժեք հստակություն չկա ավիահաղորդակցության գործարկման հնարավորության վերաբերյալ, սակայն հույս կա։ Բոլորի հույսը կապված է նախևառաջ այն բանի հետ, որ ռուս խաղաղապահներին կհաջողվի հաստատել կայուն ավիահաղորդակցություն արտաքին աշխարհի հետ։ Բայց այս հարցի վերաբերյալ որևէ կոնկրետ ժամկետ ասել դեռևս չեմ կարող»,- հայտարարել է Մարտիրոսյանը։

Նա նաև նշել է, որ Լեռնային Ղարաբաղի Հանրապետության իշխանությունները դիմել են Ռուսաստանի կառավարությանը՝  խնդրելով աջակցել պատերազմից հետո փախստականների վերաբնակեցման խնդրի լուծման հարցում։ Ինչպես ասել է պաշտոնյան՝ տարածաշրջանում վերջին զինված բախումների ընթացքում շուրջ 35-45 հազար արցախցի կորցրել է իր տունը։ Այս թիվը ներառում է ինչպես նրանց, ում տներն ավերվել են հրետակոծությունների հետևանքով, այնպես էլ նրանց, որոնց տները եղել են հայկական տարածքներում, սակայն, ըստ եռակողմ համաձայնագրի, անցել են Ադրբեջանին:

Մարտիրոսյանն ասել է նաև, որ Լեռնային Ղարաբաղի Հանրապետության իշխանությունները պատրաստ են դիտարկել կորոնավիրուսի դեմ ռուսական «Սպուտնիկ V» պատվաստանյութի ձեռքբերման հնարավորությունը, եթե այն արդյունավետ լինի հենց Ռուսաստանում պատվաստումների ընթացքում։

«Պատվաստումների հարցը դեռ չի քննարկվում: Կարծում եմ, որ մենք անպայման դրան կանդրադառնանք այն բանից հետո, երբ այլ երկրների օրինակով կհամոզվենք, որ ռուսական պատվաստանյութն արդյունավետ է: Նախևառաջ՝ Ռուսաստանի օրինակով: Ինչպես հասկանում եմ՝ Ռուսաստանում պատվաստումը դեռ նոր պետք է սկսվի։ Եթե այն արդյունավետ լինի, ինչու չէ, մենք կարող ենք նաև դիտարկել այս հարցը»,- ասել է Արցախի պետնախարարը:

Տաթև Ֆռանգյան