Բանակցություններ են գնում նախկին դիրքեր վերադառնալու շուրջ․ Ստեփանակերտում հավաքված քաղաքացիների հետ հանդիպել է ռուս խաղաղապահ զորակազմի փոխհրամանատարը. Հայկ Խանումյան

Ստեփանակերտում ռուս խաղաղապահների բազայի մոտ տեղի ունեցած հավաքն ավարտվել է։ Քաղաքացիների հետ հանդիպել է Արցախում ռուս խաղաղապահ զորակազմի հրամանատար, գեներալ-լեյտենտանտ Ռուստամ Մուրադովի տեղակալը։ Այս մասին Factor.am-ի տեղեկացրեց Արցախի քաղաքական գործիչ Հայկ Խանումյանը, որը քաղաքացիներին կոչ էր արել հավաքվել ռոուսական ռազմաբազայի մոտ՝ պարզելու, թե ինչպես է թշնամին, հակառակ պայմանավորվածության, գրավել Հին Թաղեր և Խծաբերդ գյուղերը։

Հարցին՝ հնարավոր եղա՞վ որևէ բան պարզել, Խանումյանը պատասխանեց․ «Հանդիպել ենք հրամանատարի տեղակալի հետ, բացատրություններ են տվել։ Իրավիճակն այս պահին կայնունացել է, բանակցություններ են գնում նախկին դիրքեր վերադառնալու շուրջ։ Սրվել է իրավիճակը, համաձայնագրի կնքումից ի վեր ամենալուրջ խախտումն է եղել, հիմա փորձում են իրավիճակը լուծել։ Այնտեղ խաղաղապահներ չեն եղել, մեր զորքն է եղել, և դրանից էլ հենց օգտվել են, հրետանային կրակի աջակցությամբ հարձակում են գործել ու առաջացել»,- նշեց Խանումյանը։

Նրա խոսքով՝ ադրբեջանական կողմը գրավել է Արցախի Հին թաղերը, Դիզափայտը և առաջացել դեպի Խծաբերդ։ «Ըստ համաձայնագրի՝ զորքերը պետք է մնային այնտեղ, որտեղ այդ ժամանակ եղել են, այսինքն՝ ներառում էին Հին թաղերը, Դիզափայտը, Խծաբերդը։ Իրենք հիմա գրավել են Հին թաղերը, Դիզափայտը, առաջացել դեպի Խծաբերդ, Խծաբերդի մեջ մտել են, բայց դիրքերը մեր ձեռքում են»,- մանրամասնեց Խանումյանը։

Նա նաև տեղեկացրեց, որ այժմ քաղաքացիների հավաքը վերջացել է, սակայն պայմանավորվածություն է ձեռք բերվել վաղը առավոտյան 11։00-ին կրկին հանդիպել հրամանատարի տեղակալի հետ՝ իրավիճակը  հասկանալու համար։

Անժելա Պողոսյան