12.01.2025 | 22:00
Ընտրությունները կեղծվեցին, բայց մենք էլ չպատրաստվեցինք այնպես, ինչպես անհրաժեշտ էր․ Զուրաբիշվիլի
Արցախում 250 շենք վերականգնման ենթակա չէ․ երբ կլուծվի բնակֆոնդի խնդիրը․ ՏԵՍԱՆՅՈՒԹ
Հասարակություն
12.12.2020 | 16:03
Հադրութցի Անժելա Թունյանը վերադառնում է Արցախ, բայց չգիտի՝ որտեղ է բնակվելու։ Այս տեսանյութը նկարահանվել է նոյեմբերի 18-ին, երբ 5 օրվա ընթացքում արդեն Արցախ էր տեղափոխվել ավելի քան 3․500 բնակիչ։ Անժելայի նման այսօր էլ հարյուրավոր արցախցիներ գնալու ցանկություն ունեն, բայց բնակության տեղ՝ ոչ։ Արցախի կառավարությունը հորդորել է՝ վերադառնան միայն նրանք, ովքեր տուն ունեն և այն ավերակ չէ։ ԱՀ քաղաքաշինության նախարար Արամ Սարգսյանը նշում է՝ Մարտունին ու Ստեփանակերտն ամենաշատը տուժած քաղաքներն են։
Վնասի չափը դեռևս հստակ չէ, գույքագրումն ընթացքի մեջ է։ Նախատեսում են այն ավարտել մինչև տարեվերջ։ Սրան զուգահեռ՝ նաև վերականգնման աշխատանքներ են ընթանում։
Կեցության հարցերը լուծվում են նաև դատարկ տների հաշվին։ Արամ Սարգսյանի խոսքով՝ սեփականատերերը դեմ չեն։
Արամ Սարգսյանի խոսքով՝ կեցության հարցն առաջնայիններից է հատկապես այն բնակիչների համար, որոնք կորցրել են ոչ միայն տունը, այլև բնակավայրը։ ՀՀ-ում Արցախի կառավարության օպերատիվ շտաբի ղեկավար Միքայել Վիրաբյանը նշում է՝ մինչ Արցախ հասնելն են փորձում այդ հարցերին լուծում տալ։
Վիրաբյանը թվեր է ներկայացնում՝ մինչ այս պահը, պաշտոնական հաշվառման համաձայն, Հայաստան էր տեղափոխվել 88․000-ից ավելի արցախցի։ Առայժմ վերադարձել է կեսից պակասը՝ մոտ 32․000-ը։
Ի դեպ կացարանների հարցերով ոչ միայն շտաբ են դիմում, այլև Հայաստանում Արցախի ներկայացուցչություն՝ իրենց բնակավայրերը կորցրած շուշեցիներ, հադրութցիներ, հարակից գյուղերի բնակիչներ։ Նրանից մեկին օրեր առաջ հանդիպեցինք․ Ստելլա Միրզոյանը Շուշիի Ղազանչեցոց եկեղեցու մոմավաճառն է եղել, ասում է՝ չի եկել որևէ բան պահանջելու, ուղղակի ուզում է իմանալ՝ հետո ինչ են անելու։
Առայժմ հայտնի չէ, թե երբ ամբողջությամբ կլուծվի Արցախում բնակֆոնդի հարցը՝ ժամկետներն անորոշ են։ Քաղաքաշինության նախարարի խոսքով՝ հուսով են՝ 2-2․5 տարում։
Մինչ այդ՝ շուշեցիները, հադրութցիներն ու բնակավայր կորցրած մյուս արցախցիները ստիպված են մի տեղ տեղավորվել ու սպասել։
Մանրամասները՝ տեսանյութում։
Իրինա Մկրտչյան
