05.03.2025 | 23:16
Հայաստանի մի շարք հասցեներում էլեկտրաէներգիայի անջատումներ
Ալիևի հերթական խայտառակությունը միջազգային լրատվական հարթակում․ ակնհայտ ստերով համեմված հարցազրույց՝ BBC-ին
Քաղաքականություն
09.11.2020 | 12:39
Ադրբեջանի նախագահ Իլհամ Ալիևը շարունակում է խայտառակվել միջազգային լրատվական հարթակներում՝ շարունակ հերքելով ակնհայտ ու արդեն իսկ ապացուցված փաստերը։ Այս անգամ Ալիևը զրուցել է BBC-ի հետ։ Նա հայտարարել է, թե խաղաղության հնարավորություն չի տեսնում, քանի դեռ Հայաստանում վարչապետ է Նիկոլ Փաշինյանը։
Լրագրողի այն հարցին՝ ինչպե՞ս պատահեց, որ Շուշիում մեկ օրում եկեղեցին երկու անգամ խոցվեց և ի՞նչ է պարզել հետաքննությունը, որը Ալիևը պետք է անցկացներ, նա պատասխանել է, թե հետաքննություն անցկացնելու համար անհրաժեշտ է լինել դեպքի վայրում, և շարունակել պնդել, թե դա, հնարավոր է, «կա՛մ եղել է ադրբեջանական հրետանու սխալը, կա՛մ հայկական կողմի սադրանք»:
Հստակեցնող հարցին՝ արդյո՞ք հնարավոր է երկու անգամ սխալվել ու երկու անգամ թիրախավորել եկեղեցին, Ալիևն առանց կարմրելու հայտարարել է․ «Այո՛, ինչո՞ւ ոչ»։
Հարցազրույցի ժամանակ Ադրբեջանի առաջնորդը նաև շարունակել է պնդել, թե ադրբեջանական ԶՈՒ-ն չի թիրախավորում խաղաղ բնակավայրերը, ինչին ի պատասխան՝ BBC-ի լրագրողը մեջբերել է Ստեփանակերտում աշխատող իրենց սեփական թղթակցի և Human Rights Watch կազմակերպության մանրամասն փաստագրված վկայություններն այն մասին, որ ադրբեջանական կողմը կասետային և այլ զինատեսակներով թիրախավորում է Արցախի խաղաղ բնակչությանը։ Այս փաստերը ևս Ալիևը կեղծիք և սուտ է որակել։ Լրագրողի դիտարկմանը, թե դրանք հենց ականատեսների վկայություններն են, բայց Ալիևը համառորեն պնդել է․ «Մենք չենք օգտագործել դրանք, դա մեկ այլ կեղծ տեղեկատվություն է»:
Ակնհայտորեն զարմացած լրագրողի հարցին՝ մի՞թե ամբողջը կեղծ լուրեր են, Ալիևը քմծիծաղով է արձագանքել․ «Ինչո՞ւ ոչ»։
Տաթև Ֆռանգյանը
