13.01.2025 | 11:39
«Եռաբլուրից» գողացված ծաղիկները վաճառել են Հյուսիսային պողոտայում՝ մեկ հատը 500-ից 1000 դրամով. երկու անձ կալանավորվել է․ ՔԿ
Ադրբեջանական պրովոկացիա է ՀՀ տարածքի ռմբակոծումը․ Թուրքիան ու Ադրբեջանը ՌԴ-ին դրդում են քայլերի, որ տրոհեն Մինսկի խումբը․ Ստյոպա Սաֆարյան. ՏԵՍԱՆՅՈՒԹ
Քաղաքականություն
03.11.2020 | 22:05
Factor.am-ի հարցազրույցը Հանրային խորհրդի նախագահ, քաղաքագետ Ստյոպա Սաֆարյանի հետ
-Հայաստանի և Ռուսաստանի միջև սկսվել են ռազմական աջակցության շուրջ խորհրդակցությունները, այս մասին տեղեկացրել է ԱԺ Արտաքին հարաբերությունների հանձնաժողովի նախագահը։ Հիշեցնենք, որ Փաշինյանն էր նամակով դիմել Պուտինին։ ԱԺ փոխխոսնակն էլ ասաց՝ հայկական կողմը լիովին բավարարված է ՌԴ-ի արձագանքից։ Ըստ Ձեզ՝ ինչի՞ հիման վրա է բավարարված լինելու մասին այս հայտարարությունը՝ կոնկրետ ո՞ր քայլերի։
-Հոկտեմբերի 25-26-27-ից հետո, երբ պատերազմի ինտենսիվությունը հենց բուն արցախյան թատերաբեմում ինչ-որ չափով ստաբիլացավ, այդ ընթացքում ուժեղացան, այսպես կոչված, կոնֆլիկտի գոտուց դուրս բնակավայրերի թիրախավորման գործողությունները։ Բնականաբար, դա անում էր Ադրբեջանը և պատասխան գործողությունների տեղիք տալով ադբեջանական այլ բնակավայրերի պարագայում՝ Բարդա, Թերթեր, Գյանջա, և արդեն նկատելի էր, որ թատերաբեմը կարող էր ընդլայնվել։ Հենց այդ շրջանում նրանց կողմից խոցումներ եղան Վարդենիսի շրջանում, ՀՀ-ի հարավում։ Տեսանելի էր, որ հակառակորդը դիվերսիոն խմբեր նետելով Շուշիի և Լաչինչի ուղղությամբ, փորձում է գործողությունների հող նախապատրաստել՝ այդ ուղղություններով գրոհելով։
Այդ ուղղությունները մեզ համար կարմիր գծեր են։ Դա գոյամարտ է մեզ համար՝ պահպանելու առնվազն ամեն գնով ՀՀ-Արցախ հաղորդակցությունը։ Սա կարմիր գիծ է նաև Մինսկի խմբի համանախագաների համար։ Եթե դա Հայաստանի համար գոյամարտ է, ուրեմն Հայաստանն ակնհայտորեն կանգնած է այդ գիծն անցնելուն մոտ, եթե ադրբեջանական բանակի կողմից լինի նման փորձ։ Սա նշանակում է, որ ՀՀ-ն մտնում է պատերազմի մեջ, իսկ այս դեպքում նա ունի ռազմավարական դաշնակից՝ Ռուսաստանը, որի հետ երկու հարթություն կա ռազմական համագործակցության, մեկը ՀԱՊԿ-ի շրջանակում, մյուսը՝ երկկողմ։
Եվ ահա երկկողմ մակարդակով խորհրդակցություն է սկսվել, որովհետև ՀՀ-ն պետք է տեղեկացնի իրավիճակի և իր գործողությունների մասին։ Մենք չենք կարող առանց տեղեկացնելու մտնել մի բանի մեջ, որը բերելու է մյուսի պարտավորությունների կատարմանը։ ՀՀ տարածքի ռմբակոծումը ադրբեջանական պրովոկացիա է, ինչի մասին պետք է տեղյակ պահվի։ Հայաստանը ճիշտ գործընթաց սկսեց։ Ես տեղյակ չեմ՝ ՀՀ-ն ու ՌԴ-ն ինչ են արել, բայց ենթադրել կարելի է՝ բոլոր հարցերով ստացված են պատասխաններ։ Բավականին լուրջ ռիսկեր կան, ՌԴ-ն դա տեսնում է, բայց չի ցանկանում կողմ դառնալ հակամարտությանը, որովհետև կկորցնի Մինսկի խմբում իր դիրքը։ Իրականում Թուրքիան և Ադրբեջանը փորձում են ՌԴ-ին դրդել այնպիսի քայլերի, որպեսզի հիմք ունենան Մինսկի խումբը տրոհելու, ապացուցելու, որ ՌԴ-ն հակամարտության կողմ է, Հայաստանի կողքին է և հետևաբար՝ ինքը պետք է չլինի Մինսկի խմբում, իսկ եթե իրենք թույլ են տալիս, որ մնա խմբում, ապա հետևաբար լինի չորրորդ աթոռը ՌԴ-ի կողքին, և ինչպես ՌԴ-ն է հանդես գալիս Հայաստանի կողքին, այդ նույն սկզբունքով Անկարան պետք է ունենա աթոռի տեղ Ադրբեջանի համար։
Ռոբերտ Անանյան
