14.01.2026 | 23:33
Կառավարությունը փոփոխություն է առաջարկում ավագանու անդամների հրաժարականի կարգում
Իլհամ Ալիևը առանց նախապայմանների պատրաստ է բանակցել Մոսկվայում
Քաղաքականություն
28.10.2020 | 17:20
Ադրբեջանի նախագահ Իլհամ Ալիևը հայտարարել է, որ պատրաստ է Ռուսաստանի մայրաքաղաքում ՀՀ վարչապետ Նիկոլ Փաշինյանի հետ բանակցություններին, սակայն կասկածում է, որ «Երևանն ունակ է ղարաբաղյան հակամարտության հարցում կառուցողական աշխատանքի», գրում է «Ինտերֆաքս»-ը։
«Ես նման հրավեր չեմ ստացել։ Ես մեկ անգամ չէ որ մասնակցել եմ եռակողմ հանդիպումների, սակայն երբ Հայաստանում իշխանության է եկել Փաշինյանը, նման հանդիպումներ չեն եղել։ Այդպիսի հանդիպումներ են եղել ՀՀ նախկին նախագահների հետ, և ես երբեք չեմ հրաժարվել այդ հանդիպումներից»,- ասել է Ալիևը «Ինտերֆաքս»-ին տված հարցազրույցում։
Ալիևն ընդգծել է, որ այդ հանդիպումները դրական է գնահատում, քանի որ Ռուսաստանը՝ որպես Մինսկի խմբի համանախագահ, կարգավորման հարցում առանձնահատուկ դերակատարություն ունի։
«Պատրաստ եմ ժամանել Մոսկվա Հայաստանի վարչապետի հետ բանակցությունների, ընդ որում, ինչպես դուք եք ասում, առանց որևէ նախապայմանի»,- հայտարարել է Ալիևը։
Նկատենք, որ սա առաջին դեպքը չէ, որ Ալիևը հայտարարում է Մոսկվա մեկնելու պատրաստակամության ու այդպիսի հրավեր չստանալու մասին։ Այսպես ՝ հոկտեմբերի 19-ին Ալիևը հայտարարել էր․ «Մենք մշտապես պատրաստ ենք հանդիպել և՛ Մոսկվայում, և՛ ցանկացած այլ վայրում, որպեսզի վերջ դնենք հակամարտությանն ու գտնենք կարգավորման ուղիներ։ Այս դեպքում ես նման հրավեր չեմ ստացել, այդ պատճառով էլ այս հարցն ինձ չպետք է ուղղված լինի»։
Տաթև Ֆռանգյան
