17.09.2026 | 23:38
Սամվել Կարապետյանի տնային կալանքը երկարաձգվել է
Ադրբեջանը պատրաստ է Հայաստանի հետ բանակցությունների ինչպես Մոսկվայում, այնպես էլ ցանկացած այլ վայրում․ Ալիև
Քաղաքականություն
19.10.2020 | 18:36
Բաքվի ներկայացուցիչները պատրաստ են Լեռնային Ղարաբաղի շուրջ հայկական կողմի հետ բանակցություններ վարել ինչպես Մոսկվայում, այնպես էլ ցանկացած այլ վայրում։ Այս մասին ՏԱՍՍ-ին տված հարցազրույցում ասել է Ադրբեջանի ղեկավար Իլհամ Ալիևը։
«Մենք մշտապես պատրաստ ենք հանդիպել և՛ Մոսկվայում, և՛ ցանկացած այլ վայրում, որպեսզի վերջ դնենք հակամարտությանն ու գտնենք կարգավորման ուղիներ»,- ասել է Ալիևը՝ պատասխանելով հարցին՝ պատրա՞ստ է, արդյոք, անձամբ մեկնել Մոսկվա, որպեսզի ՌԴ միջնորդությամբ հանդիպի Հայաստանի ղեկավարի հետ։
Ադրբեջանի ղեկավարը, միաժամանակ, հայտարարել է, թե Բաքվում «պատրաստ են ցանկացած տիպի շփման»։
«Այս դեպքում ես նման հրավեր չեմ ստացել, այդ պատճառով էլ այս հարցն ինձ չպետք է ուղղված լինի։ Բազմաթիվ անգամներ Ռուսաստանի նախագահ Վլադիմիր Պուտինն անձամբ և նրա նախորդը՝ Դմիտրի Մեդվեդևը, եռակողմ բանացկություններ են անցկացրել Հայաստանի ու Ադրբեջանի ղեկավարների միջև»,- հիշեցրել է Ալիևը։
Նրա խոսքով՝ Ռուսաստանը մշտապես կարևոր դերակատարություն է ունեցել այս հարցում։
«Դրա համար կան օբյեկտիվ պատճառներ՝ ինչպես պատմական, այնպես էլ աշխարհագրական, ինչպես նաև այն պատճառով, որ Ռուսաստանը տարիներ շարունակ մեր տարածաշրջանում ակտիվ գործել է ու կա փոխհամագործակցության բարձր մակարդակ։ Այս պատճառով էլ մենք պատրաստ ենք ցանկացած շփման»,- հավելել է Ադրբեջանի ղեկավարը։
