ԵՐԵՎԱՆԻ ԺԱՄԱՆԱԿՈՎ. Հայի ուժը միաբանության մեջ է՝ առանց «դիմադիր» և «ընդդիմադիր» խաղալու․ Վիգեն Ստեփանյան. ՏԵՍԱՆՅՈՒԹ

«Հայի ուժը միաբանության մեջ է՝ առանց «դիմադիր» և «ընդդիմադիր» խաղալու։ Այսօր, ինչպես երբևէ, միաբանությունը կարևոր է, բայց դա պետք է տեղի ունենա խելացի քայլերի ու մտքերի շուրջ, այդ ամենի հիմքում պետք է լինի ոչ միայն հայրենասիրությունը, այլև՝ հեռատեսությունը»,- Factor.am-ի հետ զրույցում նման տեսակետ է հայտնում դերասան, բեմադրիչ Վիգեն Ստեփանյանը։

ՀՀ վարչապետ Նիկոլ Փաշինյանը երեկ ֆեյսբուքյան ուղիղ եթերի ժամանակ հայտարարեց, որ թասիբը պետք է եռա Հայաստանում և Արցախում։ Նա նշեց, որ առաջնագծից փախչողներին հանրությունը պետք է պարսավանքի ենթարկի:

«Մեր թիկունքն ամուր է։ Կան մարդիկ, որոնք զլանում են, գլուխ են պահում, բայց դա ընդհանուր բնորոշիչ չէ, կարևորն այն է, ինչ կատարվում է մարտի դաշտում։ Ես հպարտ եմ, որ մենք այսպիսի սերունդ ունենք, այսպիսի հայ տղերք ունենք։ Եթե տղերքը այդպես իրենց հայրենիքը սիրել գիտեն, ուրեմն երկիրս ապահով ձեռքերի մեջ է»,- նկատում է պարոն Ստեփանյանը։

Անդրադառնալով միջազգային հանրության արձագանքին՝ դերասանը նշում է՝ հայը իր հույսը կարող է դնել միայն հայի վրա․ «Այսօր ամբողջ աշխարհը կոչ անելուց բացի՝ ոչինչ չի անում․ անտարբերությունը քողարկվում է ճշմարիտ կոչերով։ Պարզվում է՝ մարդկային կյանքը, որն ամենաթանկն է, զրո է․ կարևոր են գազամուղներն ու նավթամուղները, որոնք կուրացրել են մարդկանց»։

Բեմադրիչը շեշտում է՝ պետք չէ ասել․ «Մենք պատրաստ ենք զոհվել», այլ՝ «Մենք պատրաստ ենք կռվել ու հաղթել», պետք չէ ասել․ «Մենք հաղթելու ենք», այլ՝ «Մենք արդեն հաղթել ենք»։

Մանրամասները՝ տեսանյութում։

Աննա Բաբաջանյան