30.06.2026 | 23:28
«Ուիմբլդոն»․ Կարեն Խաչանովը մեկնարկել է հաղթանակով
Շրջադարձային պահ է․ վարչապետը բոլոր քաղաքապետներին կոչ արեց կամավորների ջոկատներ ստեղծել. ՏԵՍԱՆՅՈՒԹ
Քաղաքականություն
21.10.2020 | 16:20
Մեր անելիքը պայքարելն է մինչև վերջ և անմնացորդ, անսասան՝ մեր ժողովրդի իրավունքների համար: Այս մասին Ֆեյսբուքի ուղիղ եթերում ասաց ՀՀ վարչապետ Նիկոլ Փաշինյանը:
«Պայքարել մեր ժողովրդի իրավունքների համար՝ նշանակում է առաջին հերթին զենք վերցնել և նվիրվել հայրենիքի պաշտպանության գործին: Այս պրոցեսն արդյունավետ և շարունակական կազմակերպելու պարագայում է, որ մենք, ի վերջո, կկարողանանք հասնել մեզ համար ընդունելի դիվանագիտական լուծման: Ըստ էության, Ադրբեջանն այսօր ասում է, որ որևէ այլ բանի, բացի Ղարաբաղի կապիտուլյացիայից, համաձայն չէ, իսկ դուք դա հասկանում եք, թե ինչ է նշանակում…
Մենք դեռ 1990-ականների սկզբին ձևակերպել ենք, որ առանց Արցախի չկա Հայաստան: Պաշտպանել Արցախի ժողովրդի իրավունքը՝ նշանակում է պաշտպանել հայ ժողովրդի իրավունքը: Սա առաջին հերթին նշանակում է կռվել, զենք վերցնել և կռվել հանուն այդ իրավունքների այնքան ժամանակ, մինչև հնարավոր կլինի դիվանագիտական եղանակով հասնել ընդունելի որևէ տարբերակի»,- ասաց վարչապետը:
Նա կոչ արեց մեր երկրի բոլոր քաղաքապետերին՝ առանց բացառության, բոլոր գյուղապետերին, պետական և տեղական ինքնակառավարման բոլոր մարմիններին, այդ մարմինների ղեկավարներին, որ նրանք ստանձնեն լիդերությունը, ձևավորեն կամավորական ջոկատներ, որոնք կիրականացնեն հայ ժողովրդի իրավունքի պաշտպանության գործը: «Այդ ջոկատները պետք է դրվեն գլխավոր շտաբի պետի տրամադրության տակ, և ձևավորման պահը պետք է համարվի համարժեք զինվորական երդմանը: Դա նշանակում է, որ նրանք պետք է կանգնեն ամուր այն տեղերում և իրականացնեն այն խնդիրը, ինչը որ նրանց առջև կդնի հրամանատարությունը»,- ասաց Փաշինյանը՝ ընդգծելով, որ շրջադարձային պահ է:
Մանրամասները՝ տեսանյութում:
