Էրդողանը ստիպված կլինի խաղից դուրս գալ՝ Ալիևին թողնելով մենակ․ Տարասովը Բաքվին պատմությունն է հիշեցնում

Արդյոք Թուրքիան կմնա՞ Ադրբեջանի դաշնակիցը ԼՂ հակամարտության ձգձգվող պատերազմի ընթացքում։ Ռուսական ՌԻԱ Նովոստին անդրադարձել է այս հարցին ու զրուցել կովկասագետ, պատմական գիտությունների թեկնածու Ստանիսլավ Տարասովի հետ։

Տարասովը բացատրում է, որ Լեռնային Ղարաբաղի ճանաչումն ամբողջությամբ կփոխի իրավիճակը. «Եթե Երևանը դիմի նման քայլի, Հայաստանը իրավական առումով պատերազմի մեջ կմտնի այդ հողերն իրենը համարող  Ադրբեջանի հետ։ Հակամարտությունը կընդլայնվի, այժմ այն սահմանափակված է ԼՂՀ շրջանակներում, չնայած որ որակվում է որպես հայ-ադրբեջանական պատերազմ»։

Փորձագետը կարծում է, որ Հայաստանի կողմից ԼՂՀ-ն ճանաչելու մասին այլ պետություններին ուղղված կոչերը նրանց վրա պատասխանատվություն դնելու փորձ է։

«Երևանը պատահաբար չէ, որ դիմում է ֆրանսիացիներին։ Եթե Փարիզն ընդունի նման որոշում, ապա ՀՀ իշխանությունները երկրորդ կամ անգամ երրորդ պլան կմղվեն»,- պարզաբանել է նա։

Այնուամենայնիվ, հավելում է նա, քանի դեռ շարունակվում են ռազմական գործողությունները, դատել ապագա դիվանագիտական մանևրների մասին, վաղ է։

«Թուրքիան խոսում է մինչև հաղթանակ պատերազմի մասին, չնայած իր Գլխավոր շտաբը, որը, ինչպես երևում է, ծրագրել էր օպերացիան, չի ապահովել բլիցկրիգը։ Եթե ադրբեջանական բանակը գրավեր Ստեփանակերտը, խոսակցությունն այլ կերպ կլիներ։ Սակայն հակամարտությունը շարունակվում ու շարունակվում է ։ Իսկ աշխարհում և հատկապես Եվրոպայում մեծ աջակցություն է վայելում Հայաստանը։ Հայաստանին ու Լեռնային Ղարաբաղին ձեռնտու է ձգձգել զինված հակամարտությունը»,- բացատրում է Տարասովը։

Այն մասին, որ պատերազմը շուտ չի ավարտվի, վկայում են ռազմական գործողությունների գոտուց հնչող  հայտարարությունները։ Պայքարը ծավալվում է ներքևներում,  իսկ բուն Ղարաբաղը՝ լեռներն են, որտեղ ադրբեջանական բանակը կխրվի հայկական պաշտպանական դիրքերում։

Տարասովի կարծիքով՝ Ալիևը, կապվելով Անկարայի հետ, նեղացրել է իր համար մանևրելու տարածքը։

«Էրդողանը արկածախնդրի չափազանց բացասական իմիջ ունի։ Թուրքիան կռվում է Սիրիայում ու Լիբիայում, երկար տարիներ է իր բանակն ապարդյուն պայքարում է Մերձավոր Արևելքում քրդական աշխարհազորայինների դեմ։ Չնայած պրոպագանդային, լուրջ հաղթանակներ չեն եղել։ Եվ եթե Էրդողանին չաջակցեն աշխարհի խոշոր խաղացողները, նա ստիպված կլինի խաղից դուրս գալ՝ Ալիևին թողնելով մենակ։ Ժամանակին Աթաթուրքը Բաքուն հանձնել է Մոսկվային, ուր Կարմիր բանակը  մտել է առանց որևէ կրակոցի»,- կանխատեսում է փորձագետը։

Տաթև Ֆռանգյան