02.08.2026 | 21:08
Շոգ եղանակին՝ առավել զգոնություն. ՍԱՏՄ-ի կոչը հանրային սննդի ոլորտի ներկայացուցիչներին և միջոցառումների կազմակերպիչներին
Մեր զինվորները զոհվում են նաև հավասարության նշան դնող հայտարարությունների պատճառով․Արման Բաբաջանյան. ՏԵՍԱՆՅՈՒԹ
Քաղաքականություն
28.09.2020 | 15:04
Աշխարհում քաղաքականությամբ զբաղվողների աչքերն ու ականջները մնում են փակ, անկախ նրանից` ինչ են տեսնում ու ինչ են լսում: Ակնհայտ է մեկ բան՝ այս պատերազմը քաղաքակրթական և արժեբանական պատերազմ է, որը մենք մղում ենք նաև նրանց փոխարեն, ովքեր հարկի ու անհարկի հանդես են գալիս այդ արժեքների պաշտպանության դիրքերից։ Այս մասին այսօր ԱԺ արտահերթ նիստում հայտարարեց անկախ պատգամավոր Արման Բաբաջանյանը:
Նրա խոսքով՝ իրերն իրենց անունների կոչով դիմելու դեպքում պետք է ասել. «Ինչպես մեր ռազմավարական դաշնակիցները, այնպես էլ մեզ մարդու իրավունքների ու ազատությունների մասին ճառեր կարդացողները թքած ունեն ինչպես մեր ռազմավարական շահերի, այնպես էլ մարդու ամենաաստվածային իրավունքի՝ կյանքի իրավունքի բռնաբարման իրողությունների վրա»:
«Մինչ աշխարհի տարբեր մայրաքաղաքներում գրվում են դատապարտող դատարկ հայտարարություններ, այդ նույն պահին զոհվում են մեր զինվորներն ու խաղաղ բնակիչները: Զոհվում են ոչ միայն ադրբեջանական հրետակոծությունների, նաև հավասարության նշան դնելով՝ այդ հրետակոծության իրավունքը լեգիտիմացնող հայտարարությունների պատճառով»,- ասաց պատգամավորը:
Նա նաև շեշտեց. «Մենք հաղթելու ենք մեզ պարտադրված պատերազմում, բայց ճշմարտությունը ևս հաղթելու է, հաղթելու է երեսպաշտությանն ու երկակի ստանդարտներին»:
Հիշեցնենք՝ այսօր Ազգային ժողովում հրավիրվել է արտահերթ նիստ, որի օրակարգում 2020թ. սեպտեմբերի 27-ին Արցախի Հանրապետության դեմ Ադրբեջանի սանձազերծած ռազմական ագրեսիան դատապարտելու վերաբերյալ ԱԺ հայտարարության նախագիծն է:
Մանրամասները՝ տեսանյութում:
