Հայաստանը պատերազմ սկսելու ոչ մի դրդապատճառ չունի․ Թոմաս դե Վաալ

Հարավային Կովկասում հայտնի վերլուծաբան Թոմաս Դե Վաալը համոզված է, որ Ադրբեջանն առաջինն է սկսել արցախա-ադրբեջանական շփման գծի երկայնքով ռազմական գործողությունները, քանի որ Հայաստանը պատերազմ սկսելու ոչ մի դրդապատճառ չունի։ Այս մասին փորձագետն ասել է «Ahval» գործակալությանը տված հարցազրույցում, գրում է gagrule.net-ը:

«Հայաստանը պատերազմում հաղթել է 1990-ականներին, նրանք ունեն այն տարածքը, որն ուզում էին։ Նրանք ցանկանում են կարգավորել ստատուս քվոն»,- ասել է դե Վաալը։

Թոմաս դե Վաալը հավելել է, որ մի քանի պատճառներից ելնելով՝ Ադրբեջանը հավատում է, որ իր ռազմական գործողությունները կպսակվեն հաջողությամբ։

Պարբերականը ներկայացրել է նաև իրադարձությունների քրոնիկոնը։

«Սեպտեմբերի 27-ին վաղ առավոտյան Ադրբեջանն ակտիվ ռազմական գործողություններ է սկսել շփման գծում՝  հարվածելով խաղաղ բնակավայրերին, այդ թվում՝ մայրաքաղաք Ստեփանակերտին։ Արցախի բնակիչներին կոչ է արվել մտնել ապաստարաններ։ Ստեփանակերտը հայտարարել է, որ պատասխանը կլինի համարժեք, և որ իրավիճակի ամբողջ պատասխանատվությունը կրելու է Ադրբեջանի ռազմաքաղաքական ղեկավարությունն ու անձամբ Իլհամ Ալիևը։

Համաձայն հստակեցված տվյալների՝ թշնամին ունի շուրջ 200 մարդկային կորուստ, ոչնչացվել է 30-ից ավելի տանկ, 2 տասնյակից ավելի ԱԹՍ և այլ զենք ու զինտեխնիկա։

Խաղաղ բնակչության շրջանում զոհեր կան՝ Մարտունիում զոհվել են մեկ կին ու մեկ երեխա։

Նախնական տվյալների համաձայն՝ հայկական կողմն ունի 16 զոհ ու ավելի քան 100 վիրավոր»,- գրել է պարբերականը։