Չեմ բացառում, որ տարբեր բաներ կպարզվեն ընդդիմադիր գործիչների վերաբերյալ. Ռուբեն Ռուբինյան. ՏԵՍԱՆՅՈՒԹ

Կարծում եմ՝ առավել քան ակնհայտ է, թե որ կողմն է ապակառուցողական և ռազմատենչ լեզու կիրառում, որ կողմն է հարձակվում մյուսի վրա և որ կողմն է տապալում կամ փորձում տապալել բանակցային գործընթացը։ Այս մասին ԱԺ-ում լրագրողների հետ ճեպազրույցում ասաց «Իմ քայլը» խմբակցության պատգամավոր Ռուբեն Ռուբինյանը՝ անդրադառնալով Ալիևի հայտարարություններին:

Պատգամավորը նշեց, որ ադրբեջանական կողմը մշտապես անում է կատեգորիկ հայտարարություններ խաղաղ գործընթացի վերաբերյալ, և Հայաստանի դիրքորոշումը տրամաբանական է՝ անհնար է առարկայական բանակցություններ վարել այնպիսի պայմաններում, երբ կողմերից մեկն անընդհատ սպառնում է ուժի կիրառմամբ, և երկրորդ՝ երբ կողմերից մեկը նախապես պայմաններ է դնում:

«Օրինակ՝ Ադրբեջանի ղեկավարությունը հայտարարում է, որ հակամարտության հանգուցալուծումը հնարավոր է միայն Ադրբեջանի տարածքային ամբողջականության շրջանակում, սա ապակառուցողական, կատեգորիկ հայտարարություն է, որն անհնար է դարձնում առարկայական քննարկումները»,- ասաց Ռուբինյանը:

Նա նաև ընդգծեց, որ կա՛մ այս հակամարտությունը կլուծվի Հայաստանի, Արցախի և Ադրբեջանի ժողովուրդների համար ընդունելի տարբերակով, կա՛մ այս հակամարտությունը չի լուծվի: Անդրադառնալով ներքաղաքական զարգացումներին՝ ԲՀԿ, ՀՅԴ և «Հայրենիք» կուսակցությունների նախաձեռնած հանրահավաքին՝ Ռուբինյանը նշեց, որ չի կարծում, թե հնարավոր կլինի հանրային լուրջ մոբիլիզացիա ապահովել:

«Այդ երեք ուժերը չէ, որ պետք է հանրությանը մոբիլիզացնեն: Այդ երեք ուժերը չեն կարող և չեն կարողանալու Հայաստանում լուրջ հանրային աջակցություն մոբիլիզացնել։ Պատճառները պետք է փնտրեն իրենց անցյալում և ներկայում»,- նշեց նա:

Ռուսական «Դոսյե» կենտրոնի հրապարակման վերաբերյալ հարցադրմանն ի պատասխան՝ Ռուբինյանը նշեց. «Ակնհայտ է, որ «Կանդիտատ»-ը Վանեցյանը չէ»:

Ռուբեն Ռուբինյանը նաև հայտարարեց, որ արտահերթ խորհրդարանական ընտրությունների անհրաժեշտություն չի տեսնում: «Ես չեմ բացառում, որ տարբեր բաներ կպարզվեն տարբեր ընդդիմադիր քաղաքական գործիչների վերաբերյալ, տարբեր քրեական գործեր կան»,- հավելեց նա:

Մանրամասները՝ տեսանյութում: