Քաղաքականություն
10.09.2020 | 12:59«Տեղյակ չեմ եղել պարոն Ջուլֆալակյանի այդ մտադրության մասին և ափսոսում եմ, որ նման որոշում է կայացրել»,- Factor.am-ի հետ զրույցում ասաց ԱԺ «Իմ քայլը» խմբակցության պատգամավոր Արթուր Հովհաննիսյանը՝ անդրադառնալով նույն խմբակցությանից Արսեն Ջուլֆալակյանի՝ մանդատից հրաժարվելու որոշմանը:
Նա նաև հավելեց, որ այդ հարցը խմբակցությունում կքննարկվի՝ լսելով կոնֆլիկտի երկու կողմերին:
Հիշեցնենք, որ երեկ հունահռոմեական ոճի ըմբիշ, աշխարհի չեմպիոն, «Իմ քայլը» խմբակցության պատգամավոր Արսեն Ջուլֆալակյանն իր ֆեյսբուքյան էջում գրառում էր կատարել՝ տեղեկացնելով պատգամավորական մանդատը վայր դնելու որոշման մասին և նշել, որ իր այդ քայլի պատճառը ԿԳՄՍ նախարար Արայիկ Հարությունյանի հետ ունեցած սկզբունքային անհամաձայնություններեն են՝ նրա ենթակայության տակ գտնվող ոլորտների կառավարման մոտեցումների վերաբերյալ:
Արթուր Հովհաննսիայնը նշեց, որ Արսեն Ջուլֆալակյանը կանդրադառնա իր ֆեյսբուքյան գրառմանը և պարզաբանումներ կտա լրատվամիջոցներին, քանի որ, ամենայն հավանականությամբ, այլ մանրամասներ կունենա հայտնելու:
Անդրադառնալով կրթության ոլորտի վերաբերյալ քննադատություններին ու դժգոհություններին՝ պատգամավորը նշեց. «Կրթության ոլորտի վերաբերյալ խնդիրների մասին խոսակցությունների մեծ մասը հնչում է ոչ «առողջ» կողմերից: Բայց տարբեր ոլորտների հետ կապված քննադատությունները բնական են, որովհետև այլևս չենք ապրում այնպիսի երկրում, որտեղ խորհրդարանը հարյուր տոկոսով պետք է կիսի Կառավարության մոտեցումները։ ԱԺ-ի և Կառավարության միջև դեբատները պետք է տեղի ունենան, որպեսզի ունենանք ավելի արդյունավետ կառավարում և լավ որոշումներ»:
Մանրամասները՝ տեսանյութում:
