Հասարակությունը պետք է հաղթահարի մոտեցումը, որ երեխան ծնողի սեփականությունն է․ Զառա Հովհաննիսյան. ՏԵՍԱՆՅՈՒԹ

Մեր հասարակությունը պետք է հաղթահարի այն մոտեցումը, որ երեխան ինչ-որ մեկի սեփականությունն է, և այդ հարցում պետությունը մեծ անելիքներ ունի։ Այս մասին այսօր «Խաշթառակի երեխայի մահը՝ ահազանգ պետությանը. հե՜յ, ո՞վ կա այդտեղ» թեմայով քննարկման ժամանակ նշեց իրավապաշտպան Զառա Հովհաննիսյանը։

«Մեր հասարակության մեջ ընդունված չէ, որ երեխան դիտարկվի որպես իրավունքի սուբյեկտ և ճանաչվի նրա իրավունքները։ Մենք թե՛ լավ առումով, թե՛ վատ առումով երեխայի ողջ պատասխանատվությունը դնում ենք ընտանիքի վրա։ Եթե երեխայի փոխարեն ծնողը լավ որոշումներ է կայացնում, մենք դա էլ ենք ընդունում, և նույնիսկ դպրոցում չենք խրախուսում երեխաների ինքնուրույնությունը, նրանց կամքի, վերլուծության, արտահայտչամիջոցների դրսևորումները։ Մեր հասարակության մեջ այդ խնդիրն առկա է, որ երեխան, կարծես թե, ինչ-որ մեկի սեփականությունն է, եթե ընտանիքի կամ ծնողի սեփականությունը չէ, ապա հասարակության որևէ շերտի սեփականությունն է, և երեխան իրավունքների կրողը չէ։ Այս հարցում պետությունը մեծ գործ ունի անելու թե՛ տեղեկատվական, թե՛ կրթական առումով։ Եթե մենք խոսում ենք կոնկրետ մի ընտանիքի վերաբերյալ, թե ով պետք է աշխատեր, որ մարմինը, որ սոցիալական աշխատողը, բայց քանի նման ընտանիքներ կան, որոնց մասին որևէ մեկը տեղեկություն չունի՝ ինչ է կատարվում այնտեղ, երեխան ինչպիսի խոցելի իրավիճակներում է կամ ընտանիքն ինչպես չի կարողանում հասկանալ, օգնել երեխային իր խնդիրներում»,- նշեց իրավապաշտպանը։

Վերջինիս խոսքով՝ այս հարցում շատ կարևոր է տեղեկատվական մեծ արշավներ իրականացնելը։

Մանրամասները՝ տեսանյութում։