Կաֆկայի «Դղյակը» պետք է դարձնել կառավարության կանոնադրության հավելված․ Փաշինյանը՝ Բադասյանին. ՏԵՍԱՆՅՈՒԹ

Այսօր Կառավարության նիստում «Արտակարգ իրավիճակներում բնակչության պաշտպանության մասին» և կից նախագծերի քննարկման ժամանակ ՄԻՊ Արման Թաթոյանն ասաց, որ քննարկվող նախագծերի փաթեթը թեև շրջանառվում է հունիսից, սակայն ՄԻՊ-ն այն ստացել է քննարկման՝ 1 օր ժամկետով։ Թաթոյանի ասածը զայրացրեց վարչապետ Նիկոլ Փաշինյանին․ «Ուզում եմ հասկանալ` էս գործելակերպին ե՞րբ է վերջ տրվելու, երբ կառավարության նիստում հնչում է`չի ուղարկվել կարծիքի, երեկ է ուղարկվել կարծիքի: Սա ինչքա՞ն է շարունակվելու»:

Վարչապետի աշխատակազմի ղեկավար Էդուարդ Աղաջանյանն ասաց, որ վարչապետի աշխատակազմը նման գործառույթ չունի: «Բա ո՞վ ունի»,- հարցրեց Փաշինյանը:

Աղաջանյանը պատասխանեց` այն գերատեսչությունը, որ նախաձեռնում է այդ նախագիծը:

Վարչապետը նույն հարցն ուղղեց արդարադատության նախարար Ռուստամ Բադասյանին․ «Ինչո՞ւ չի ուղարկվել»: Բադասյանը պարզաբանեց`ուշ է ներկայացվել, քանի որ մինչև վերջին պահը պարզ չի եղել`որ նախարարությունը պետք է զեկուցող լինի: «Ինչ կապ ունի զեկուցողը։ Հունիսից օգոստոս հրատապ ռեժիմո՞վ եք աշխատել»,- հարցրեց վարչապետը։ «Մենք ուղարկել ենք վաչապետի աշխատակազմ, ներկայացրել ենք մեր դիտարկումները, մեր կարծիքն ենք արտահայտել, որ սա առողջապահության բնագավառի նախագիծ է և խնդրել ենք՝ մեզ տեղյակ պահել հետագա ընթացքի մասին։ Դրանից հետո բազմաթիվ քննարկումներ են եղել և իմացել ենք, որ մենք այսօր պետք է զեկուցող լինենք», պատասխանեց նախարարը, որին վարչապետն արձագանքեց․ « Կաֆկայի «Դղյակը» պետք է դարձնել Կառավարության կանոնադրության հավելված»։

Մանրամասները՝ տեսանյութում։