Պետական մարմինները, հնարավորության դեպքում, պետք է տեղափոխել արվարձաններ կամ այլ քաղաքներ․ Նարեկ Բաբայան․ ՏԵՍԱՆՅՈՒԹ

Արդյունաբերական, գյուղատնտեսական, տրանսպորտի, կապի, շինարարության և առողջապահության ոլորտներում գործող ձեռնարկություների, խոշոր օբյեկտների մասնավորեցումը սկսվել է 1995 թվականից և, ըստ էության, տևել մինչև 2005 թվականը։ Մասնավորեցվել է 1500-ից ավելի ընկերություն, այսինքն՝ այդ կարճ ժամանակահատվածում զանգվածային սեփականաշնորհում է իրականացվել, որի հիմնական նպատակն արդյունավետ շուկայական տնտեսության անցումն էր։ Այս մասին այսօր «Թրանսփարենսի Ինթերնեշնլ հակակոռուպցիոն կենտրոն» ՀԿ-ի կողմից իրականացված՝ ՀՀ-ում ռազմավարական նշանակության գույքի մասնավորեցման, խնդրահարույց ներդրումների և գործարքների վերաբերյալ ուսումնասիրության առցանց ներկայացմանը նշեց Պետգույքի կառավարման կոմիտեի նախագահ Նարեկ Բաբայանը։

«1995-2005 թվականներին պետական գույքի վաճառքի սահմանված ձևերից բաց բաժանորդագրության ձևն է կիրառվել, մասնավորեցման ենթակա խոշոր ձեռնարկությունները գնահատվել են հաշվեկշռային մեթոդներով, որը նույնպես խնդրահարույց է, և որի արդյունքները թերագնահատված էին գույքի իրական արժեքից։ Պետական գույքի կառավարման նպատակն արդյունավետության բարձրացումն է և ներդրումների խրախուսումը։ Գույքն աճուրդով ձեռք բերելիս, երբ նախկինում դա բավականին էժան է տեղի ունեցել, իսկ հետո վերավաճառվել, գնորդը բավականին մեծ եկամուտներ է ունեցել և չի իրականացրել կամ չեն եղել ֆիքսված որոշակի պարտավորություններ։ Պարտավորությունների կատարման վերահսկման համակարգը նույնպես թերություններ է ունեցել։ Այսինքն՝ գույքի կառավարման գործընթացը չի եղել արդյունավետ»,- նշեց Բաբայանը։

Պետգույքի կառավարման կոմիտեի նախագահը նաև 2018 թվականից ի վեր իրականացված բարեփոխումներին անդրադարձավ։

«Հրապարակայնության և արդյունավետության բարձրացման նպատակով, 2019 թվականի ապրիլի 25-ի Կառավարության N506 որոշմամբ, ներմուծվել է պետական գույքի հաշվառման օնլայն գրանցամատյան։ Սա հնարավորություն է տալու առցանց աճուրդներ իրականացնել։ 2019 թվականին նաև ընդունվել է պետական գույքի հայեցակարգը։ Նույն թվականի հունիսի 27-ին պետական անշարժ գույքի օտարման կամ վարձակալության աշխատանքները կանոնակարգելու նպատակով ստեղծվել է հանձնաժողով, և կանոնակարգվել են ներդրումային մեծ հետաքրքրություն ունեցող գույքի օտարման նախապատրաստական աշխատանքները։ Հանձնաժողովը քննության է առել Երևանում գտնվող տասնյակ՝ բարձր արժեք ունեցող գույք և դրանց որոշ մասին հավանություն տվել։ Մեր ռազմավարությունն է՝ հնարավորինս արդյունավետ օգտագործել Երևանի կենտրոնում գտնվող թանկարժեք գույքը, պետական մարմինները, հնարավորության դեպքում, տեղափոխել արվարձաններ կամ այլ քաղաքներ»,- նշեց Բաբայանը։

Մանրամասները՝ տեսանյութում։

Նելլի Մելքոնյան