Հասարակություն
31.07.2020 | 10:53Արթուր Վանեցյանն ԱԱԾ հրավիրվել է՝ բացատրություն տալու, այսինքն՝ նախապատրաստվում են նյութեր: Որքանով մեզ ներկայացվեց, նյութեր են նախապատրաստվում՝ աշխատակիցներից մեկին աշխատանքի վերականգնելու առնչությամբ։ Լրագրողների հետ զրույցում այս մասին ասաց ԱԱԾ նախկին տնօրեն Արթուր Վանեցյանի փաստաբան Լուսինե Սահակյանը:
«Ես սա համարում եմ օրենքի նկատմամբ ծաղր, որովհետև գոյություն ունի օրենք, որով անձը, 50 տարեկանը լրանալուց հետո, իրավունք ունի մինչև 5 տարով այդ ժամկետը երկարացնել: Այդպես էլ արվել է, անձը վերականգնվել է աշխատանքի՝ օրենքի պահպանմամբ: Եթե նույնիսկ խախտում եղած լիներ, անձը 60 տարեկանում վերականգնված լիներ, սա պատասխանատվություն առաջացնել չի կարող: Չկա պարոն Վանեցյանի դեմ քրեական գործ հարուցելու որևէ հիմք, սակայն հասել են նույնիսկ նրան, որ փորձում են մեղադրանք առաջադրել», – ասաց փաստաբանը:
Լուսինե Սահակյանը չբացառեց, որ ԱԱԾ նախկին տնօրենը ևս մեկ անգամ հրավիրվի ԱԱԾ, եթե, իհարկե, քրեական գործ հարուցելու որոշում կայացվի:
«Ես համարում եմ, որ սա հստակ քաղաքական հետապնդում է, այլ դիրքորոշում հնարավոր չէ ունենալ», – ասաց նա:
Անդրադառնալով հարցին, թե ինչ փուլում է գտնվում ՀՔԾ-ում քննվող քրեական գործը, որով անցնում էր նաև Արթուր Վանեցյանը, պաշտպանն ասաց, որ այն կարճվել է։
Հիշեցնենք՝ խոսքը Միքայել Մինասյանի հայտարարության հիման հարուցված քրեական գործի մասին է։ Նա ասել էր, որ Նիկոլ Փաշինյանի անունից Արթուր Վանեցյանն իրենից գումար է պահանջել։
Մանրամասները՝ տեսանյութում։
