02.02.2026 | 12:22
Թրամփը Թեհրանի հետ գործարքի հույս ունի` չնայած «տարածաշրջանային պատերազմի» մասին Խամենեիի նախազգուշացումներին
Հայաստան–ԵՄ համաձայնագիրը՝ վերջին փրկօղակ մեր երկրի համար. «Փաստ»
24.11.2017 | 09:38
«Փաստ» օրաթերթը գրում է.
Նոյեմբերի 23–ին ՀՀ նախագահ Ս.Սարգսյանը մեկնեց Բելգիայի Թագավորություն, Բրյուսելում Եվրոպական ժողովրդական կուսակցության և ԵՄ Արևելյան գործընկերության գագաթաժողովին մասնակցելու համար: Նախատեսվում է, որ նոյեմբերի 24–ին կստորագրվի Հայաստան–ԵՄ նոր շրջանակային համաձայնագիրը:
Համաձայնագիրը կստորագրվի, թե՝ ոչ, պարզ կդառնա հաշված ժամեր հետո: Ստորագրման «հեփփի էնդ»–ից առաջ վերջին անգամ հայ փորձագետները քննարկեցին, թե համաձայնագրի ստորագրումը երկրի զարգացման համար ինչ նոր հեռանկարների հնարավորություն կստեղծի:
Նրանք հույս ունեն, որ այն հնարավորություն կտա երկրում առկա վասալային քաղաքականությունից ձերբազատվել, և հասարակությունը վերջապես հնարավորություն կունենա ավելի բարեկիրթ հարաբերություններ կառուցել քաղաքական, տնտեսական և մնացած այլ ոլորտներում:
Միջազգային հարցերի փորձագետ Հովհաննես Իգիթյանի կարծիքով որևէ մեկը Հայաստանին չի պարտադրել Եվրամիության հետ նոր շրջանակային համաձայնագիր ստորագել: Դա մենք ենք ցանկացել և ի տարբերություն ԵԱՏՄ–ի, այն հնարավորություն է տալիս բոլորովին այլ ուղղությամբ ու տեմպերով զարգացնել երկիրը:
Այս համաձայնագրով Հայաստանն իր վրա պարտավորություն է ստանձնում Սահմանադրությամբ և օրենքներով ամրագրված իրավունքներն իրականացնելու, իսկ ԵՄ–ն պարտավորվում է դրա համար վճարել: Սա նշանակում է, որ իշխանություններն ինչ–որ տեղ նաև պարտադրված կլինեն նախկինում իրենց կողմից ընդունած որոշումները վերանայելու և նոր որոշումներ կայացնելու համար, համոզված է փորձագետը:
«Բնական մենաշնորհների դեմ պայքարը նույնպես կդառնա օրակարգային, քանի որ բոլորն են հասկանում, որ այս կամ այն ընկերությանը բնական մենաշնորհի թույլտվություն տալը չի կարող երկրի ընդհանուր տնտեսության զարգացմանը նպաստել: Հակառակ դեպքում զարգացած երկրները նույնպես վաղուց բնական մենաշնորհներ ձևավորած կլինեին»,– ասաց Հ. Իգիթյանը:
Փորձագետ Ստեփան Գրիգորյանի ներկայացմամբ ԵԱՏՄ համաձայնագրում ներառված բոլոր դրույթները չկան ԵՄ համաձայնագրում և հակառակը: Եվ եթե օրինակ հայ սպառողը միայն «Գազպրոմ», «Ռոսնեֆտ» բառերի պատճառով 2 անգամ ավելի է վճարում իր սպառածի համար, ապա ԵՄ համաձայնագրով պետք է նման մենաշնորհների այլընտրանք ձևավորել:
Խոսելով ընդհանուր ավիացիոն համակարգին անդամակցելու հնարավորության մասին, փորձագետի կարծիքով, Հայաստանը մտնելով ընդհանուր ավիացիոն տարածք և դիվերսիֆիկացնելով ոլորտը, կարող է մոտ 3 անգամ ավելի էժան ավիատոմսեր վաճառել:
«Մենք բոլորս 100 եվրոյանոց օդանավի տոմսը գնում ենք 400 դոլարով, բայց ես չեմ ուզում, որ իմ ժողովուրդը նման զրկանքներ կրի: Խնդիրն այն է, որ մեր իշխանություններն էլ են դեմ նման էժանացումների, և ես կարևորում եմ, որ այս մասին ժողովուրդն իմանա, քանի որ դա շատ կարևոր է հետագա պայքարն առավել արդյունավետ կազմակերպելու համար: Ես ուզում եմ ցույց տալ, որ մենք ունենք բավականին բարձր մակարդակի փորձագիտական խմբեր, և նմանատիպ դրույթները, որոնք ամրագրված են համաձայնագրում, պետք է կարողանանք համատեղ ջանքերով կյանքի կոչել»,– ասաց Ստեփան Գրիգորյանը:
