ԱԺ-ն ընդունեց «Բանկային գաղտնիքի մասին» օրենքում փոփոխություններ կատարելու և մի շարք այլ նախագծեր. ՏԵՍԱՆՅՈՒԹ

ՀՀ ազգային ժողովն ընդունեց օրենքի նախագիծ, որով նոր պահանջներ են ներկայացվում սպառողական կրեդիտավորման համար: Նախագծի հեղինակներ, «Իմ քայլը » խմբակցության պատգամավորներ Արտակ Մանուկյանի ու Վարազդատ Կարապետյանի կողմից ներկայացված «Սպառողական կրեդիտավորման մասին» Հայաստանի Հանրապետության օրենքում լրացումներ կատարելու մասին օրենքն ԱԺ նիստում ստացավ 112 կողմ ձայն:

Նախագծով սահմանվում է, որ կրեդիտավորման պայմանագրում սպառողը ձեռագրով, իսկ էլեկտրոնային եղանակով պայմանագիր կնքելու դեպքում՝ էլեկտրոնային եղանակով տպագրելու միջոցով գրում է, որ գիտակցում է տարեկան փաստացի տոկոսադրույքի չափը՝ նշելով այդ տոկոսադրույքը:

Մինչև երեք ամիս ժամկետով կնքվող մինչև 300,000 ՀՀ դրամի չափով սպառողական կրեդիտների համար Կենտրոնական բանկն իր նորմատիվ իրավական ակտերով սահմանում է պարտադիր պահանջներ ու պայմաններ, վարկավորման կանոններ՝ հիմք ընդունելով սպառողի վարկունակության, սպառողի պարտքի և եկամուտի հարաբերակցության, վարկը սպասարկելու սպառողի ունակության գնահատման չափանիշները:

ՀՀ ազգային ժողովը երկրորդ ընթերցմամբ և ամբողջությամբ ընդունեց «Բանկային գաղտնիքի մասին» ՀՀ օրենքում փոփոխություն կատարելու մասին» օրենքի նախագիծը։

Նախագծի հեղինակը ՀՀ կառավարությունն է: Օրենքի նախագծով առաջարկվում է ուժը կորցրած ճանաչել օրենքի այն դրույթը, որով ԿԲ-ն իրավասություն էր ստանում հրապարակելու անպարտաճանաչ պարտատերերի անունները։

Նախագիծն ընդունվեց ընթերցմամբ և ամբողջությամբ՝ 82 կողմ և 30 դեմ ձայներով:

ՀՀ ազգային ժողովն առաջին ընթերցմամբ ընդունեց «Բարգավաճ Հայաստան» խմբակցության պատգամավոր Միքայել Մելքումյանի կողմից ներկայացված օրենքի նախագիծը, որով առաջարկվում է բարձրացնել երաշխավորված ավանդների չափը։

«Բանկային ավանդների ներգրավման մասին» օրենքում փոփոխություններ և լրացում կատարելու մասին օրենքի նախագծով նախատեսվում է երաշխավորված դրամական ավանդային շեմը 10 միլիոնից դարձնել 16 միլիոն, իսկ արտարժույթով երաշխավորված ավանդի շեմը՝ 5 միլիոնից 7 միլիոն:

Նախագիծը ստացավ 111 կողմ և 2 ձեռնպահ ձայներ։