Ծանր հիվանդության հիմքով կալանքից ազատող նախագիծն ընդունվեց առաջին ընթերցմամբ․ ամբողջությամբ ընդունվեցին մի շարք նախագծեր

Ազգային ժողովն առաջին ընթերցմամբ ընդունեց «ՀՀ քրեական դատավարության օրենսգրքում» լրացումներ կատարելու մասին» օրենքի նախագիծը, որով առաջարկվում է քրեադատավարական օրենսդրության շրջանակում հստակ նախատեսել կալանքի կրումից ազատ արձակելու հնարավորություն՝ կալանքի կրմանը խոչընդոտող ծանր հիվանդության հիմքով:

Նախագիծն առաջարկել է ՀՀ Կառավարությունը։ Այն ընդունվեց միաձայն՝ 110 կողմ ձայներով: Խորհրդարանը երկրորդ ընթերցմամբ և ամբողջությամբ ընդունեց «Իմ քայլը» խմբակցության պատգամավորներ՝ Նիկոլայ Բաղդասարյանի և Սոնա Ղազարյանի կողմից ներկայացված ՀՀ քրեական դատավարության օրենսգրքում լրացումներ և փոփոխություններ կատարելու մասին օրենքի նախագիծը, որով անչափահասների մեկ օրվա հարցաքննության առավելագույն ժամկետը 6 ժամից նվազեցնել մինչև 4 ժամի: Օրինագիծը ստացավ 113 կողմ ձայներ։ ԱԺ-ն երկրորդ ընթերցմամբ և ամբողջությամբ ընդունեց նաև «ՀՀ քրեական դատավարության օրենսգրքում» լրացում կատարելու մասին» օրենքի նախագիծը, որով առաջարկվում է հնարավորություն տալ հեռավար կարգով՝ տեսակապի միջոցով հարցաքննել քրեական գործով վկաներին և տուժողներին: Նախագծի հեղինակներն են «Իմ քայլը» խմբակցության պատգամավորներ Նիկոլայ Բաղդասարյանն ու Արյուսակ Ջուլհակյանը:

112 կողմ ձայներով առաջին ընթերցմամբ ընդունվեց նաև «ՀՀ քրեական դատավարության օրենսգրքում լրացումներ կատարելու մասին» օրենքի նախագիծը: Նախագծով նախատեսվում է, որ առաջարկվում է վարույթն իրականացնող մարմնի կողմից դատարան միջնորդություն ներկայացնելու հնարավորություն տալ նաև էլեկտրոնային տարբերակով։