Հայաստանը միջին կարևորություն ունի ՌԴ-ի համար, սակայն շատ հուսալի է․ գնահատել են ՀԱՊԿ-ում ՌԴ դաշնակիցների կարևորությունն ու հուսալիությունը

Ռուսական Ռազմավարությունների և տեխնոլոգիաների վերլուծության կենտրոնի փորձագետներն ուսումնասիրել են ՀԱՊԿ-ում Ռուսաստանի դաշնակիցներ Հայաստանի, Ղազախստանի, Բելառուսի, Ղրղզստանի և Տաջիկստանի ռազմական, տնտեսական, ժողովրդագրական և բնական ներուժը։ Հետազոտության արդյունքներով նրանք կազմել են Ռուսաստանի համար այս պետությունների կարևորության և Մոսկվայի հանդեպ նրանց դաշնակցային լոյալության մակարդակի վարկանիշ, գրում է «Կոմերսանտ»-ը։

Աղբյուրի փոխանցմամբ՝ կենտրոնի փորձագետները պարզել են, որ հետխորհրդային տարածքում չկա որևէ դաշնակից, որը միաժամանակ շատ կարևոր և հուսալի է Ռուսաստանի համար։

Հետազոտության արդյունքները ներկայացված են «Դաշնակիցները» գրքում, որում Ռուսաստանի գործընկերների կարևորությունը դիտարկվել է ոչ միայն ըստ ռազմական նշանակության, այլև տնտեսական, ժողովրդագրական, մշակութային, աշխարհագրական և բնական ռեսուրսների ներուժի։

Հայաստանը, ըստ հետազոտության հեղինակների, միջին կարևորություն ունի Ռուսաստանի համար, սակայն չափազանց հուսալի է։ Ռուսաստանի համար Հայաստանի դաշնակցային ներուժը Կենտրոնի փորձագետները գնահատել են՝ «միջին կարևորություն/բարձր հավատարմություն» բանաձևով։

«Այս գործընկերոջ կարևորությունը որոշվում է կայուն գործոնով՝ աշխարհագրական դիրքով։ Ռուսաստանի համար Հայաստանը փաստացի ֆորպոստ է անդրկովկասյան տարածաշրջանում, որի գոյությունն ինքնին լուրջ ազդեցություն ունի Անդրկովկասի մյուս երկու հանրապետությունների վրա»,- ասված է հետազոտությունում։

ՌԴ-ի համար որպես Հայաստանի ընդհանուր ներուժի կարևոր բաղադրիչ փորձագետները նշել են Սփյուռքը, Ռուսաստանի համար կարևորության գործոններ են աշխարհագրական դիրքը, Թուրքիային զսպող և Անդրկովկասում ազդեցության գործիք հանդիսանալը։

Բելառուսի պարագայում Ռուսաստանի համար դաշնակցային ներուժը գնահատվել է «բարձր կարևորություն/միջին հավատարմություն» բանաձևով։

Այս երկրի ընդհանուր ներուժը Ռուսաստանի համար անվտանգային դիրքն է ՆԱՏՕ-ի և ՌԴ-ի միջև, կարևորության գործոնները՝ աշխարհագրական դիրքը, էթնիկ, մշակութային, լեզվական մերձավորությունը։

Ղազախստանի ներուժի գնահատականը՝ «բարձր կարևորություն/միջին հավատարմություն»։ Այս երկրի ընդհանուր ներուժը Ռուսաստանի համար բնական հարստություններն են, կարևորության գործոնները՝ խոշոր տնտեսական գործընկերությունը, մեծաթիվ ռուսական սփյուռքը, սահմանի երկայնքը։

Ռուսաստանի համար Ղրղզստանի ներուժի գնահատականը՝ «ոչ այնքան կարևոր/շատ հավատարիմ»։ Այս երկրի ընդհանուր ներուժը Ռուսաստանի համար աշխատանքային ռեսուրսներն են, կարևորության գործոնները՝ թմրանյութերի մաքսանենգության դեմ պայքարը, Աֆղանստանում և Կենտրոնական Ասիայում Ռուսաստանի ազդեցության ապահովումը։

Տաջիկստանի ներուժի գնահատականը՝ «ոչ կարևոր/ոչ հավատարիմ»։ Այս երկրի ընդհանուր ներուժը Ռուսաստանի համար աշխատանքային և հիդրոռեսուրսներն են, կարևորության գործոնները՝ թմրանյութերի մաքսանենգության դեմ պայքարը։