Ո՞ւմ ջրաղացին եք ջուր լցնում՝ գյուղատնտեսության, թե՞ բանկերի. Հրաչ Բերբերյանը՝ գյուղատնտեսության վիճակի մասին

Բանկերն ամեն մի պատեհ առիթ օգտագործում են՝ գյուղացուն վարկ չտալու համար։ Այս մասին այսօր կազմակերպված ասուլիսի ժամանակ ասաց «Ագրարագյուղացիական միավորում» ՀԿ ղեկավար Հրաչ Բերբերյանը։

Նրա խոսքով՝ Կառավարությունը ոչ թե պետք է աշխատի բանկերի, այլ հենց գյուղացու հետ:

«Պետք է աշխատեն հեկտարի հաշվարկով և, իհարկե, հաշվի առնելով կուլտուրան։ Հացազգինե՞րն եք խթանում, ուրեմն հացազգիների համար պետք է տաք։ Երկու անգամ հացազգիների ցանքատարածությունը պակասել է։ Չենք հասկանում, որ եթե Ռուսաստանը չտվեց այդ ցորենը, ի՞նչ եք անելու, գնալու եք՝ այն միջազգային աղբը բերեք, որ կպչունակություն չունի, հաց չի՞ թխում»,- ասաց Բերբերյանը։

Նրա պնդմամբ՝ այսօր ֆերմերները խնդրի առաջ են կանգնել. « Մարդը արտասահմանից տնկանյութ է ներկրել, գործիքներ, չի կարողանում վարկը ստանալ, մաքսատունն էլ այնտեղ է տուգանքներ դրել, որ այդ գումարները մուծի, ստանա։ Բանկն էլ էսօր-էգուց է գցում, ամեն անգամ մի թուղթ ուզում։ Ո՞ւմ ջրաղացի վրա եք ջուր լցնում, գյուղատնտեսության, թե՞ բանկերի»:

Հրաչ Բերբերյանն ընդգծեց՝ բանկեր էլ կան, որ դժգոհ են Կառավարության ֆինանսավորումից, ասում են՝ տեղ չի հասնում։

«Այսօր ծանր է իրավիճակը, այսպես երկար չենք դիմանա, գյուղատնտեսությունում էլ կունենանք անցյալ տարվանից մի փոքր ավելի վատ իրավիճակ»,- հավելեց Բերբերյանը։

Բանախոսը նաև ընդգծեց, որ քանի դեռ ցեցի խնդիրը հաղթահարված չէ, չենք կարող ասել, որ լոլիկ ունենք:

«Գումարները դուրս են գրվել և փշիացվել: Լուրջ գումարների մասին է խոսքը։ Այսօր արդեն մենք ցեց ենք նկատում Ստեփանավանի տարածաշրջանում, որը չպետք է լիներ, եթե ժամանակին պայքար տանեին։ Դա միայն լոլիկի դեմ չի, այն մորմազգիների դեմ է։ Դրա մեջ մտնում է լոլիկը, սմբուկը, վաղահաս կարտոֆիլը: Ուղղակի վաղահաս կարտոֆիլին չի հասցնում վնասել, որովհետև նրա բերքահավաքը հունիսին վերջացնում ենք, իսկ ցեցն ակտիվանում է օգոստոսին։ Տեսնեք՝ ինչ վնաս է տալիս լոլիկի դաշտերին, քրքրում է դաշտը»,- նշեց Հրաչ Բերբերյանը:

Անժելա Պողոսյան