Քաղաքականություն
30.03.2020 | 20:20Իտալական Լոմբարդիայից՝ ավստրական Ինսբրուրկ, հետո արդեն՝ ողջ երկրով մեկ։ Կորոնավիրուսի ավստրիական ճամփորդությունն արդեն 8900-ից ավելի մարդու վարակման պատճառ է դարձել և 86 մահվան ելք ունեցել։ Մահվան առաջին դեպքը գրանցվել է մարտի 12-ին։ Ավստրիայի մայրաքաղաքում բնակվող մեր հայրենակցուհին Factor TV-ին ներկայացրել է, թե ինչպիսին է կարանտինի ավստրիական տարբերակը։
«Կարանտինը Վիեննայում այնքան խիստ չէ, ինչպես ուրիշ եվրոպական երկրներում, օրինակ՝ Իսպանիայում, Իտալիայում, Ֆրանսիայում կամ էլ Հայաստանում, որտեղ պետք է դուրս գալ միայն թղթով։ Ավստրիայում կարանտինի համեմատաբար թեթև ձևն է, բայց պետք է ասեմ, որ մարդիկ բավականին կարգապահ են, հետևում են օրենքին և դուրս են գալիս մեկ-մեկ կամ էլ ընտանիքից 2 հոգով»,- պատմում է Սեդա Տեր-Մինասյանը։
Ավստրիայում կորոնավիրուսի առաջին դեպքը գրանցվել է փետրվարի 25-ին։ Դրանից հետո ինչպես Ինսբրուկ քաղաքը, որտեղ այն հայտնաբերվել էր, այնպես էլ ավստրիական մյուս քաղաքներն ու նահանգները հայտնվել են կարանտինի մեջ։ Կարանտինը երկարաձգվել է մինչև ապրիլի 13-ը։ Այսօր էլ կանցլեր Սեբաստիան Կուրցը հայտարարել է, որ այսուհետ բոլոր սուպերմարկետների մուտքերի մոտ մարդկանց պետք է դիմակներ տրամադրվեն։
Մինչև ապրիլի 13-ը Ավստրիայում փակ կլինեն նաև բոլոր ժամանցի վայրերը, խաղահրապարակները, մշակութային ու կրթական հաստատությունները։
Վիեննայում բնակվող մեր մյուս հայրենակցուհին էլ պատմել է, թե ինչպես է անցնում իր առօրյան կարանտինի ժամանակ։
«Անկեղծ ասած՝ սովորականից շատ ավելի ուշ եմ արթնանում․ առաջ արթնանում էի 06։30-ին, իսկ հիմա՝ 11-12-ի կողմերը։ Նախաճաշ եմ անում, մի քիչ սպորտով եմ զբաղվում և անցնում եմ իմ օնլայն դասերին։ Երբ տրամադրություն եմ ունենում՝ մի քիչ երգում եմ, դաշնամուր կամ կիթառ եմ նվագում, կարդում եմ։ Ավելի շատ ժամանակ եմ անցկացնում խոհանոցում, քանի որ, իհարկե, ավելի շատ ժամանակ ունեմ, և նոր ճաշատեսակներ եմ պատրաստում»,- ասում է Լիլին։
Ավստրիայի առողջապահության նախարար Ռուդոլֆ Անշոբերը հայտարարել է, որ կորոնավիրուսի ավստրիական ամենախոշոր բռնկումն ակնկալվում է ապրիլի կեսերին ու մայիսին։ Մինչ այդ՝ այստեղ նախատեսում են ավելի քան 100 հազար քաղաքացու թեստավորել։ Այսօրվա դրությամբ՝ թեստավորվածների թիվը 49․455 է։ Կորոնավիրուսի տնտեսական վնասները հաղթահարելու համար էլ երկրում 38 միլիարդ եվրո արժողությամբ աջակցության փաթեթ է կազմվել, որից միայն 4 միլիարդը շտապօնությանն է տրամադրվելու։
Մանրամասները՝ տեսանյութում։
Նելլի Մելքոնյան
