Քաղաքականություն
21.02.2020 | 20:25Factor.am-ի հարցազրույցը «Իմ քայլը» խմբակցության պատգամավոր Քրիստինե Պողոսյանի հետ
– Սահմանադրական հանրաքվեի քարոզարշավի 5-րդ օրն է, այս օրերին ամենաշատ հնչած հարցը՝ ինչո՞ւ չփոխեցիք ամբողջ Սահմանադրությունը, այլ միայն մեկ դրույթ: Անձերից շտապ ազատվելու խնդի՞ր կար:
– Անձերի հետ կապված, բնականաբար, որևէ խնդիր չկա, բազմիցս բացատրել ենք, բացատրել են մեր իրավաբանները, որ պետք է համապատասխանեցնել Սահմանադրությունը և գործող մարմինը: 2015 թվականին Սահմանադրություն է փոփոխվել, և պետք է Սահմանադրական դատարանը և նրա բոլոր անդամները համապատասխանեն այդ գործառույթին: Այս ամենն արվում է նրա համար, որպեսզի ունենանք լեգիտիմ Սահմանադրական դատարան։
– «Այո»-ի ու «Ոչ»-ի ճամբարները բավականին պասիվ են, սա արդյո՞ք բացասական չի ազդի հանրաքվեի արդյունքների վրա: Կկարողանա՞ք 650 հազար «Այո» ապահովել:
– Պասիվ չենք, աշխատանքներ տարվում են: Փետրվարի 25-ին մենք դրամահավաք-երեկո կունենանք, որի ընթացքում նաև կհայտարավի «Այո»-ի լոգոյի հաղթողի անունը։
– Տիկի՛ն Պողոսյան, եթե «Այո»-ն հաղթի ու ՍԴ կազմը փոխվի, քննարկե՞լ եք, թե ովքեր պիտի փոխարինեն Հրայր Թովմասյային ու վեց անդամներին: Գագիկ Ջհանգիրյանի անունն էր շրջանառվում, նման քաղաքական որոշում ունե՞ք:
– Ես արդեն երկրորդ անգամ եմ լսում պարոն Ջհանգիրյանի անունը: Ես չեմ լսել, համենայնդեպս՝ չեմ մասնակցել որևէ քննարկման, որի ժամանակ նրա թեկնածությունը քննարկվի։ Ինչ վերաբերվում է թեկնածուներին, ապա նրանց պետք է առաջադրեն դատական խորհուրը, նախագահը և կառավարությունը։ ԱԺ-ն այն կառույցն է, որը պետք է ընտրի, հետևաբար՝ մենք չենք, որ պետք է առաջարկենք։
– Բանակում վերջին երկու ամսում ոչ մարտական գործություններից 13 զոհ ունենք: Ողեբրագական դեպքերը բացառելու համար ի՞նչ եք արել:
– Զոհերից չորսը դժբախտ պատահարի հետևանք էր, ունենք զոհեր, որոնց մասով քրեական գործեր են հարուցվել: Եղան պաշտոնանկություններ, որոնց մեջ կային մարդիկ, որոնք պետք է ամիսներ առաջ պաշտոնաթող արվեին։
– Ովքե՞ր։
– Պաշտոնանկ արված մարդիկ, ՌՈ պետը… չեմ ուզում մանրանալ, թե ինչի արդյունք է սա, քանի որ սա քաղաքակրթական հարց է: Մենք խնդիր ունենք՝ մանկապարտեզից դպրոց, բուհ և բանակ։ Իսկ բանակում պետք է շատ աշխատանք տարվի զինվորի հետ, զինվորը, որը բանակում է, պետք է սպայի համար լինի զավակ նման: Ամենակարևորը, եթե լինում են դեպքեր՝ թե՛ նախկինում, թե՛ հիմա, պիտի պատժվեն: Եթե շատ խիստ պատժվեն, ապա հաջորդ անգամ կիմանան, թե նման քայլի դեպքում ինչ պատժի կարժանանան։
– Այլ պաշտոնանկություններ նախատեսվո՞ւմ են, խոսվում էր ԳՇ պետի, պաշտպանության նախարարի մասին։
– Ես նման լուրեր չունեմ, չգիտեմ՝ ինչի մասին է խոսքը: Պաշտպանության նախարարը, կարծում եմ, ամեն ինչ անում է, որպեսզի մենք ունենանք հզոր, ուժեղ, անվտանգ բանակ։ Այդ հարցով մենք ևս նրա թիկունքին ենք։
– ԱԱԾ նախկին տնօրեն Արթուր Վանեցյանն էլ է բանակի ու զոհերի մասին խոսել, նա ասել էր, որ բանակը փիառվելու տեղ չէ, և որ դասալիքները, անկախ նրանից՝ հիմա պատգամավո՞ր են, թե՞ նախարար, չպետք է հնարավորություն ունենան զորամասեր մտնելու համար:
– Ինչ է նշանակում՝ դասալիքներ: Կարծում եմ՝ բոլոր նրանք, ովքեր խուսափել են բանակից, պատասխանատվության են ենթարկվել, բոլոր նրանք, որոնք օրենքով են ազատվել, այդ դեպքում ինչի՞ մասին է խոսքը: Իսկ բանակում մուտք ունենալ-չունենալու վերաբերյալ… ԱԺ պատգամավորները նման իրավունք ունեն և իրենց լիազորությունների մեջ է մտնում այցելել զորամասեր և հասկանալ՝ ինչի անհրաժեշտություն կա:
Հարցազրույցն ամբողջությամբ՝ տեսանյութում։
Լիլիթ Շաբոյան
