26.07.2026 | 17:48
Բախվել են երկու ջրային սկուտեր․ ջրափրկարարները քաղաքացիներին դուրս են բերել լճից
Ռուս-ուկրաինական պատերազմում կռված ադրբեջանցիները դատապարտվել են 3-5 տարվա ազատազրկման
Քաղաքականություն
11.06.2026 | 22:48
Ռուս-ուկրաինական պատերազմին մասնակցած և ներկայում Ադրբեջանում բանտարկված անձինք դատապարտվել են 3-ից 5 տարի ժամկետով ազատազրկման։ Ադրբեջանական լրատվամիջոցների փոխանցմամբ՝ դատարանները դատապարտել են Ուկրաինայի տարբեր կողմերում մարտական գործողություններին մասնակցած երկրի երեք քաղաքացիների։
Երեքն էլ դատապարտվել են Ադրբեջանի քրեական օրենսգրքի 12.1 և 279.1 հոդվածներով՝ արտասահմանում զինված խմբավորումներին մասնակցելու համար։
32-ամյա Մուրով Միրհաշիմլին Լենքորանի ծանր հանցագործությունների դատարանի կողմից դատապարտվել է 3 տարվա ազատազրկման։ Բեյլագանի բնակիչ Միրհաշիմլին մեղավոր է ճանաչվել 2023 թվականի մարտից մինչև 2024 թվականի հոկտեմբերը Ուկրաինայի կողմից պատերազմին մասնակցելու մեջ։ Նա դատարանում իրեն մեղավոր չի ճանաչել։
«Նրանք ճնշում են գործադրել ինձ վրա և ընտրության հնարավորություն են տվել. կամ քրեական գործ կհարուցվի, կամ ես կմեկնեմ պատերազմ: Ես համաձայնել եմ պատերազմել»,- հայտարարել է Միրհաշիմլին:
33-ամյա Ֆարիզ Հուսեյնովը Բաքվի ծանր հանցագործությունների դատարանի կողմից դատապարտվել է 4 տարվա ազատազրկման։ Նա մեղավոր է ճանաչվել 2024 թվականի ապրիլից օգոստոս ընկած ժամանակահատվածում Դոնեցկի շրջանում Ռուսաստանի կողմից կռվելու մեջ։ Հուսեյնովը դատարանում ասել է, որ իրեն մեղավոր է զգում և զղջում է իր գործողությունների համար։ Նա նշել է, որ պայմանագիրը ստորագրել է գումարի դիմաց և ակտիվորեն կռվել է ընդամենը 15 օր։ Նրան վիրավորման համար վճարել են չորս միլիոն ռուբլի։
35-ամյա Ռեալ Նաբիևը Բաքվի ծանր հանցագործությունների դատարանի կողմից դատապարտվել է 5 տարվա ազատազրկման։ Նա մեղավոր է ճանաչվել Դոնեցկի մարզի Բախմուտ քաղաքում «Վագներ» խմբավորման կազմում մարտերին մասնակցելու մեջ։ Նաբիևին, որը պնդել է, որ պատերազմից առաջ բանտարկված է եղել Ռուսաստանում, ազատ արձակվելու դիմաց առաջարկվել է վեց ամիս պատերազմում կռվելու հնարավորություն։ Նրան խոստացել են ամսական 220,000 ռուբլի (մոտավորապես 5,000 մանաթ) աշխատավարձ և Ռուսաստանի քաղաքացիություն։
Նա այդպես էլ քաղաքացիություն չի ստացել, արտաքսվել է Ռուսաստանից 2024 թվականի սկզբին, որոշ ժամանակ ապրել է Ղրղզստանում և ձերբակալվել Ադրբեջանում 2026 թվականի հունվարին։
Թարգմանությունը՝ Էմմա Չոբանյանի
