Հարություն Հարությունյանը և Աշոտ Մելիքյանը՝ Նիկոլ Փաշինյանի՝ «Երկու ՀԸ-ի լոգոյի տեղը կարելի է գրել կոռուպցիա» հայտարարության մասին

Այսօր ՀՀ վարչապետ Նիկոլ Փաշինյանը կառավարության նիստի ժամանակ հայտարարեց, որ երկրում կան հեռուստաընկերություններ, որոնց լոգոն կարելի է ջնջել և փոխարենը գրել «կոռուպցիա»: Նիկոլ Փաշինյանը, սակայն, ՀԸ-ների անունները չնշեց:

«Այսօր ՀՀ-ում ժողովրդավարության մակարդակն այնքան բարձր է, որ կան կոնկրետ անձանց, նույնիսկ կոռուպցիոներների սեփականությունը հանդիսացող հեռուստաընկերություններ։ Առնվազն երկու հեռուստաընկերության լոգոյի տեղը կարելի է գրել «Կոռուպցիա»։ Ես առանձնապես դժգոհ չեմ այդ իրավիճակից, որովհետև կարծում եմ, որ այդպիսի հեռուստաընկերության գործունեությունը մեզ համար բացահայտում է ոչ միայն հիմնական կոռուպցիոներների շրջանակը, այլ նաև նրանց շոշափուկների, և հետագայում բավականին հեշտացնում է մեր օպերատիվ աշխատանքը՝ կոռուպցիայի դեմ պայքարի առումով»,- ասաց Փաշինյանը։

«5-րդ ալիքի» գործադիր  տնօրեն Հարություն Հարությունյանը վստահ է, որ այդ հայտարարությունն իր ղեկավարած հեռուստաընկերության  մասին չէ. «Ես մի բան գիտեմ, որ դա մեզ չէր վերաբերվում, ես այդպես եմ համարում և դրա համար չեմ ուզում մտնել այդ դաշտ: Ինչո՞ւ մեզ չի վերաբերվում, որովհետև, երբ ինքը կոռուպցիա է ասում, մենք ոչ մի ձև այդ բառի մեջ չենք տեղավորվում, թող նրանք մտածեն, ովքեր տեղավորվում են, եթե կան այդպիսիք»:

Նա, սակայն, նկատում է, որ նման հարցերը կառավարության նիստի քննարկման օրակարգ չպետք է դառնան. «Ես ընդհանրապես չէի ուզի, որ կառավարության նիստի ժամանակ նման խոսակցություն լիներ, որովհետև կառավարության նիստերում շատ ավելի լուրջ հարցեր պետք է քննարկեն: Պետք է տար այդ հեռուստաընկերությունների անունները, թե պետք է չտար՝ դա արդեն մի հաշիվ է»:

Նիկոլ Փաշինյանն իր խոսքում անդրադարձել էր նաև գովազդի դաշտին: Նա ասել էր, որ  Հայաստանում ստեղծվել է երկու կառույց, որոնցից մեկը բաշխում է հեռուստատեսային գովազդի շուկայում գոյացած գումարները, մյուսը չափում է հեռուստաընկերությունների վարկանիշներն ու գումարները բաշխում ըստ վարկանիշների: «Գովազդի բաշխման այս համակարգը մոնոպոլիզացված է», – նշել էր վարչապետը:

Հարություն Հարությունյանը գտնում է, որ գովազդի դաշտում մենաշնորհ երբեք չի եղել, չի եղել նաև քաղաքական ճնշում։  Ընդդիմադիր հեռուստաընկերության գործադիր տնօրենը նաև ասում է, որ այսօր էլ չկա քաղաքական ճնշում:

«Գովազդատուների վրա քաղաքական ճնշում չկա հիմա, քաղաքական ճնշում չի եղել նախկինում: Երբ որ տնտեսության վիճակը վատ է, դրամաշրջանառությունը վատ է, իսկ գովազդի գումարն առաջանում է բիզնեսից․․․ Եթե բիզնեսի վիճակը վատ է, ուրեմն դրանից գովազդին քիչ ես հատկացնում: Մենք ունենք գովազդ, բայց ամբողջ հարցն այն է, որ տնտեսական դաշտը շատ վատ վիճակում է և գովազդատուների թիվն է նվազել: Այլ հարց է, թե որ ՀԸ-ները ինչ պայմաններով են աշխատում իրենց գովազդատուների հետ: Առաջ գովազդը շատ էր, որովհետև համացանցն այսքան տարածված չէր, եթե չեմ սխալվում՝ գովազդի 30 տոկոսը տեղափոխվել է համացանց: Գովազդայդին շուկան կակտիվանա, եթե տնտեսությունը զարգանա»,- կարծում է նա:

Հարություն Հարությունյանը չի ցանկանում մեկնաբանել՝ արդյոք Փաշինյանի հայտարարությունը կարող է ընկնալվել որպես ճնշում ՀԸ-ների նկատմամբ։

«Խոսքի ազատության պաշտպանության կոմիտեի» ղեկավար Աշոտ Մելիքյանը կարծում է, որ Նիկոլ Փաշինյանի այս հայտարարությունը ճնշում չէ մամուլի նկատմամբ: Ըստ նրա՝ Հայաստանում բազմաթիվ հեռուստաընկերություններ վերածվել են քարոզչամեքենայի:

«Կան ուժեր, որոնք ՀԸ-ների միջոցով իրենց շահերն են առաջ տանում: Կարծում եմ, որ հեռուստաընկերությունները պետք է սեփականության թափանցիկությունն ապահովեն նաև կոռուպցիայի դեմ պայքարի առումով: Ես կարծում եմ, որ նա հիմքեր ունեցել է նման հայտարարություն անելու, որովհետև կոռուպցիան նաև քաղաքական է լինում: Երբ ՀԸ-ն սպասարկում է քաղաքական շահեր և մոռանում է իր հասարակական առաքելության մասին, դա դասական քաղաքական կոռուպցիա է, եթե դրանք համապատասխան ֆինանսավորման հենք ունեն»:

Հիշեցնենք, որ մոտ 1,5 տարի առաջ էլ Նիկոլ Փաշինյանը ֆեյսբուքում գրել էր, որ Հայաստանում կա հեռուստաընկերություն, որը հակապետական քարոզչություն է իրականացնում: Աշոտ Մելիքյանից հետաքրքրվեցինք՝ արդյոք այս հայտարարությունները չե՞ն կարող հանգեցնել նրան, որ  ՀԸ-ները սկսեն կաշկանդվել։

«Դուք չե՞ք տեսնում այնպիսի ՀԸ-ներ, որոնք որ իրենց հասարակական առաքելությունը մի կողմ են թողել և աշխատում են կոնկրետ քաղաքական գործչի համար։ Ես այստեղ ճնշում չեմ տեսնում, քանի որ երևույթն ակնհայտ է»,- նշեց Մելիքյանը։

Նարեկ Կիրակոսյան