Առողջապահության նախարարությունը կրկին օպտիմալացման է դիմում

Առողջապահության նախարարությունը ՀՀ կառավարություն է ներկայացրել Ն.Բ.Հակոբյանի անվան ընդհանուր հիգիենայի և մասնագիտական հիվանդությունների գիտահետազոտական ինստիտուտը վերակազմակերպելու, այն ակադեմիկոս Ս. Ավդալբեկյանի անվան առողջապահության ազգային ինստիտուտին միացնելու նախագիծը:

Հարցը չզեկուցվող ընթացակարգով ներառված է գործադիրի հոկտեմբերի 19-ին կայանալիք նիստի օրակարգում: Որոշումը հիմնավորվում է Հակոբյանի անվան գիտահետազոտական ինստիտուտի ինքնուրույն գործունեության ոչ նպատակահարմարությամբ և ՀՀ առողջապահության նախարարության ենթակայության կառույցների գործունեության օպտիմալացման անհրաժեշտությամբ:

Նախագծում ասվում է, որ վերջին տարիներին ընկերության գործունեության արդյունավետության նվազում է նկատվում, որը պայմանավորված է կադրերի տարիքային բարձր ցենզով, շենքային անհարմարավետ պայմաններով: Ընկերության 2016 թվականի եկամուտը կազմել է 13.515.000 դրամ, իսկ ծախսերը՝ 12.188.000 դրամ:

Համաձայն 2017 թվականի նախահաշվի՝ եկամուտները կազմել են 13.270.000 դրամ, իսկ ծախսերը՝ 13.250.000 դրամ: Առողջապահական երկու ինստիտուտների միավորման արդյունքում.

1) առավել նպատակային կդառնան գիտական, կլինիկական ու հիգիենիկ ոլորտներում իրականացվող հետազոտությունները, առավել ևս, որ ազգային ինստիտուտում տեղակայված են մի շարք կլինիկական բազաներ և լաբորատորիաներ, այդ թվում` մանրէաբանության և հիգիենայի լաբորատորիան,

2) իրականացվելիք հետազոտությունները կլինեն առավել թիրախային և համապարփակ, կներառվեն ազգային ինստիտուտի տեղեկատվական վերլուծական կենտրոնի ռեսուրսները,

3) մասնագիտական հիվանդությունների ախտորոշումը և համապատասխան վերջնական եզրակացություն տալու գործառույթը կիրականացվեն ժամանակակից բժշկակագիտությանը համապատասխան` օգտագործելով ազգային ինստիտուտի մասնագիտական ներուժը,

4) Ակնկալվում է կադրային երիտասարդացում` ի հաշիվ ազգային ինստիտուտի կադրային բազայի: