«ԱԱԾ-ն պետք է դիրքորոշում հայտնի Արթուր Վանեցյանի հայտարարության վերաբերյալ». Արթուր Սաքունց. ՏԵՍԱՆՅՈՒԹ

Կոռուպցիան ԱԱԾ թիվ 1 մարտահրավերներից մեկն է, բայց մենք մինչև հիմա չենք տեսել կոռուպցիոն որևէ սխեմայի բացահայտում: Այս մասին այսօր՝ «Հեղափոխությունը հասե՞լ է ԱԱԾ, թե՞ շրջանցել է այն. ՀԿ-ները մտահոգված են» թեմայով քննարկման ընթացքում նշեց Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը:

«Մեզ համար հասկանալի չէ, թե այդ կարմիր գծեր ասվածն ինչ է իրենից ներկայացնում: Պետք է ոչ թե գնահատողական դատողություններով որակենք պետական մարմնի գործունեությունը, այլ իրավական և ժողովրդավարական պետությանը բնորոշ չափանիշներով: Հայաստանի շահերից բխում է ունենալ ԱԱԾ, որը, որպես այդպիսին, չունենք: Մարտահրավերները ոչ միայն կանխված չեն, այլ երաշխիք էլ չունենք, որ ապագայում կկանխեն»,- ասաց Սաքունցը:

Ըստ նրա՝ այսօրվա ԱԱԾ-ն չունի որևէ հայեցակարգ, որով կարելի է հասկանալ՝ ինչպես է ԱԱԾ-ն պատկերացնում իր լինելը: «Անվտանգության երաշխիք չի կարող լինել մի մարմին, որը չի կարողանում կանխել պետական գաղտնիքների մատչելիության հարցը: ՊՆ Գլխավոր շտաբի նախկին պետը, ԴԱՀԿ նախկին պետը, Հոկտեմբերի 27-ի գործով դատավորը և այլ պաշտոնյաներ, որոնք ի պաշտոնե կրում են պետական գաղտնիքներ, հայտնվում են մեկ այլ երկրում՝ իրենց հետ տանելով այդ գաղտնիքը: Եվ խոսել պետական գաղտնիքի մասին, երբ կան մարդիկ, որոնք կրում են այդ գաղտնիքն ու գտնվում են այլ երկրում, ավելի մեծ վտանգ է ազգային անվտանգության համար»,- նշեց Սաքունցը:

Նրա խոսքով՝ ԱԱԾ-ն պետք է դիրքորոշում հայտնի իր նախկին պետի հայտարարության վերաբերյալ. «ԱԱԾ նախկին պետն ասում է, որ օտարերկրյա ֆինանսավորում ստացող ՀԿ-ները և որոշ քաղաքական ուժեր պետության համար սպառնալիք են, բայց այսօրվա ԱԱԾ-ն բացարձակապես լռության է մատնում այդ հայտարարությունները: Եթե համամիտ են, պետք է գործողություններ իրականացնեն: Եթե ոչ՝ պետք է իրենց դիրքորոշումը ներկայացեն»:

Հիշեցնենք, որ դեկտեմբերի սկզբին 6 ՀԿ դիմել էր կառավարությանը՝ կոչ անելով ջանքեր ներդնել ԱԱԾ արմատական բարեփոխման ուղղությամբ: Մասնավորապես՝ «Իրազեկ քաղաքացիների միավորում», Ժուռնալիստների «Ասպարեզ» ակումբ, Հելսինկյան քաղաքացիական ասամբլեայի Վանաձորի գրասենյակ, «Թրանսփարենսի Ինթերնեշնլ հակակոռուպցիոն կենտրոն», Հանրային լրագրության ակումբ և «Բաց հասարակության հիմնադրամներ – Հայաստան» կազմակերպությունները դիմել էին վարչապետ Նիկոլ Փաշինյանին՝ պահանջով, որ վերջինս հանձնարարի ենթակա իրավապահ մարմիններին մանրակրկիտ զբաղվել նախորդ տասնամյակներում Հայաստանում տեղի ունեցած խոշոր իրադարձությունների ուսումնասիրությամբ:

Մանրամասները՝ տեսանյութում:

Նելլի Մելքոնյան