«Ֆակտորի Փրադաքշնը» սև ցուցակու՞մ է եղել. պարզաբանում են քաղաքապետարանից. ՏԵՍԱՆՅՈՒԹ

Ո՞րն է պատճառը, որ քաղաքապետարանն այն կազմակերպությանը, որին ամիսներ առաջ ուղարկել էր սև ցուցակ՝ ընթացակարգային խախտումների համար, այդ նույն կազմակերպությունը ներգրավվել է որպես մեկ անձից գնման տեսքով ծառայություն մատուցող: Այսօր՝ դեկտեմբերի 6-ին Երևանի ավագանու արտահերթ նիստում հարց բարձրացրեց «Լույս» խմբակցության ղեկավար Դավիթ Խաժակյանը՝ անդրադառնալով Ամանորի միջոցառումների կազմակերպմանը:

«Ո՞րն է տրամաբանությունը, որ կազմակերպությանն ուղարկում ենք սև ցուցակ, հետո նույն կազմակերպությունից մեկ անձից գնում ընթացակարգով գնում ենք իրականացնում»,-ասաց նա:

Ի պատասխան՝ Երևանի փոխքաղաքապետ Հայկ Սարգսյանն ասաց. «Եթե խոսքը «Ֆակտորի փրոդաքշն»-ի մասին է, ապա պետք է ասեմ, որ կազմակերպությունը սև ցուցակ ուղարկվել է նախորդ գնումներից մեկի ժամանակ հաղթող ճանաչվելուց հետո, վերջինից պահանջվող փաստաթղթերի հիմնավորումներից մեկի ուշ ներկայացնելու պատճառով: Ընդ որում, այս հանգամանքն օրենքի ուժով քննվել է բողոք քննող անձանց կողմից և որակվել է որպես ոչ էական խախտում: Ընկերությունը չի հայտնվել սև ցուցակում: Ինչ վերաբերում է կազմակերպության ընտրությանը, ապա ընկերությունների ընտրությունը կատարել է մասնագիտական թիմի կողմից՝ որպես մշակույթի ոլորտում որոշակի փորձ, նվաճումներ ունեցած կազմակերպություն»:

Նշենք, որ Երևանի ավագանու արտահերթ նիստում որոշում կայացվեց Ամանորի միջոցառումների կազմակերպման համար փոփոխություն կատարել համապատասխան որոշման մեջ և ծախսերն ավելացնել 271.79 մլն դրամով:

Մանրամասները՝ տեսանյութում:

Նարեկ Կիրակոսյան