Վերջին տարիներին և՛ սպառողն է պատրաստված, և՛ տնտեսվարողներն են ավելի լրջորեն մոտենում առևտրին․ «Սպառողների խորհրդատվության կենտրոն» ՀԿ նախագահ

Այնպիսի զեղչեր, ինչպես աշխարհի մյուս երկրներում են լինում, Հայաստանում հնարավոր չեն: Այս մասին այսօր՝ «Սև ուրբաթ։ Գլխապտույտ առաջարկնե՞ր, թե մոլորություն» թեմայով ասուլիսի ընթացքում նշեց «Սպառողների խորհրդատվության կենտրոն» ՀԿ նախագահ Կարեն Չիլինգարյանը։

«Ինչպե՞ս կարող է տնտեսվարողն ապրանքը գնել, ներկրել, մաքսազերծել, մեծ ծախսեր անել ու հանկարծ այդպիսի զեղչեր անել: Մեր շուկան շատ փոքր է՝ համեմատած խոշոր երկրների հետ, որտեղ հարյուր հազարավոր ապրանքներ են վաճառում և կարող են մեկ օր 50-70% զեղչ անել: Այդպես իրենք իրենց համար գովազդ են անում, ժողովրդի համար են հետաքրքիր դառնում: Մեր երկրում այդպիսի զեղչերն իրականությանն այնքան էլ մոտ չեն, մի քանի հարյուր կամ հազար ապրանք վաճառողը չի կարող այդ ապրանքի գինն իջեցնել 50-60%-ի»,- ասաց Կարեն Չիլինգարյանը:

Ըստ նրա՝ Հայաստանում, ի տարբերություն այլ երկրների, նախկինում բոլոր խանութների ցուցանակներին համատարած զեղչեր էին գրվում և տարին 12 ամիս զեղչ էր․ « Դա կասկածի տեղիք էր տալիս՝ ինչպես են ապրանք ներկրում և միանգամից 20-30% զեղչված արժեքով վաճառում։ Բայց վերջին տարիներին և՛ սպառողն է պատրաստված, և՛ տնտեսվարողներն են ավելի լրջորեն մոտենում առևտրին»։

Հոգեբան Մարինե Մելոյանի խոսքով էլ՝ զեղչերը մանիպուլյացիոն հնարք են տնտեսվարողների կողմից, որով նրանք հաճախորդ են գրավում: Հոգեբանը սպառողներին զգուշացնում է ուշադիր լինել: ««Զեղչ» բառն արդեն հրապուրում է սպառողին: Շատ հաճախ, երբ մենք տեսնում ենք, որ խանութի վրա գրված է՝ «զեղչ», ակամա ներս ենք մտնում և ապրանք գնում՝ անկախ նրանից, դա մեզ պետք է, թե ոչ»,- նկատեց հոգեբանը:

Նելլի Մելքոնյան