«Պետությունը լեզվի մասին օրենքով իր ասելիքն ասել է, հիմա ինչու՞ է իր խոսքը փոխում»․ Վիկտոր Կատվալյան

«Բարձրագույն կրթության և գիտության մասին» օրենքի ներդրման հարցում շտապողականություն եմ նկատում․ ի՞նչ ունենք շտապելու։ Պետք է բոլոր մտահոգությունները հաշվի առնվեն, քննարկվեն, հակառակ դեպքում՝ ինչո՞ւ ենք մեր մտահոգությունները հայտնում, եթե հենց հաջորդ օրը նախագիծը պետք է հրապարակվի։ Չէ՞ որ քննարկումները նրա համար են, որ համապատասխան շտկումներ արվեն։ Այս մասին այսօր՝ «Բարձրագույն կրթության և գիտության մասին» օրենքի նախագիծ․ ի՞նչն այն չէ, ինչո՞ւ է ուշանում» թեմայով քննարկման ընթացքում նշեց ՀՀ ԳԱԱ Լեզվի ինստիտուտի տնօրեն Վիկտոր Կատվալյանը։

«Կարծում եմ՝ այս նախագծի վրա 5 կամ 10 հոգի են աշխատել, բայց քննարկմանը մասնակցում է գրեթե ողջ գիտակրթական համակարգը։ Բացի այդ, Լեզվի մասին ՀՀ օրենքի 2-րդ կետով նշված է, որ բուհական կամ միջին մասնագիտական հաստատություններ ընդունվելիս պարտադիր է Հայոց լեզվի քննությունը։ Եվ դա այս իշխանությունների ձեռքբերումը չէ։ Այդ օրենքում գրված է, որ հայոց լեզվի ուսուցումը պարտադիր է բուհերում, և ես կարծում եմ, որ եթե այս նախագծով չենք ուզում ամրագրել այս դրույթը, ապա, բնականաբար, գործում է Լեզվի մասին օրենքը»,- ասաց Կատվալյանը։

Ըստ նրա՝ Լեզվի մասին օրենքով հայոց լեզուն արդեն իսկ արժևորված է։ «Ցավոք, ըստ երևույթի, հաջորդ քայլը լինելու է այդ օրենքի փոփոխությունը, որովհետև հանդիպումներում ասվում է, թե թողնում են բուհերի հայեցողությանը, նրանք կարող են այդ առարկայի դասավանդումն ընդգրկել կամ չընդգրկել։ Իսկ որտե՞ղ է պետությունը։ Լեզվի մասին օրենքով պետությունն իր խոսքն ասել է, հիմա ինչո՞ւ է խոսքը փոխում։ Համամիտ եմ՝ թող այս օրենքի մեջ չլինի հայոց լեզվի պարտադիր դասավանդման մասին դրույթ, բայց, չմոռանանք, որ կա Լեզվի մասին օրենքը։ Ինչու՞ այս մասին չի ասվում։ Ասում են՝ գնացե՛ք համոզեք։ Ու՞մ համոզենք, ինչո՞ւ համոզեն»,- ասաց Կատվալյանը։

Մանրամասները՝ տեսանյութում։

Նելլի Մելքոնյան