27.04.2026 | 10:50
«Խարբերդի մասնագիտացված մանկատանը» պահպանվում են նախորդ այցերով արձանագրված խնդիրները․ ՄԻՊ
Հայտարարվում է «Global IT Award»-ի այս տարվա հաղթողի անունը. ՈՒՂԻՂ
Տեսանյութեր
20.11.2019 | 13:16
ՀՀ բարձր տեխնոարդյունաբերության նախարարությունում նոյեմբերի 20-ին տեղի է ունեցել Տեղեկատվական տեխնոլոգիաների (ՏՏ) ոլորտում համաշխարհային ներդրման համար ՀՀ պետական մրցանակի 2019թ. դափնեկրի ներկայացման մամուլի ասուլիսը:
Ասուլիսի բանախոսներն էին ՀՀ բարձր տեխնոարդյունաբերության նախարար, մրցանակաբաշխության կոմիտեի նախագահ Հակոբ Արշակյանը, մրցանակաբաշխության կոմիտեի աշխատանքերը համակարգող Հովիկ Մուսայելյանն ու մրցանակաբաշխության գլխավոր գործընկեր «ՎիվաՍել-ՄՏՍ» ընկերության գլխավոր տնօրեն Ռալֆ Յիրիկյանը: Ասուլիսին ներկա էր նաև ՀՀ-ում Ճապոնիայի արտակարգ և լիազոր դեսպան Ջուն Յամադան:
Նախարարը շնորհակալություն է հայտնել մրցանակաբաշխության կազմակերպիչներին նման մեծ իրադարձությունը Հայաստան բերելու և ամեն տարի նման հրաշալի միջոցառում կազմակերպելու համար։
«Այս տարի լրանում է ՏՏ ոլորտում համաշխարհային ներդրման համար ՀՀ պետական մրցանակաբաշխության 10 տարին: Սա յուրօրինակ առաջնորդություն է այս ոլորտում՝ ունենալ ՀՀ պետական մրցանակ և դա հանձնել աշխարհում տեխնոլոգիական ոլորտի այնպիսի հսկաներին, ովքեր աշխարհն իրենց ստեղծագործությամբ փոխել են, ովքեր, կարելի է ասել, սկսել են զրոյից, ունեցել են միտք, այն զարգացրել և մարդկությանը հնարավորություն են տվել օգտվելու տեխնոլոգիաներից, որոնք մեր կյանքը էլ ավելի են հեշտացնում»,-նշել է Հակոբ Արշակյանը:
«ՎիվաՍել-ՄՏՍ» ընկերության գլխավոր տնօրեն Ռալֆ Յիրիկյանն էլ նշել է, որ արդեն 10 տարի այս նախաձեռնությունն իր շուրջն է համախմբել և Հայաստան բերել այնպիսի մարդկանց, որոնք իրենց ազդեցությունն են թողել տեխնոլոգիական ոլորտի զարգացման և առաջընթացի վրա։ Մրցանակը անչափ կարևոր է նաև նրանով, որ այն Հայաստանի համար հանդիսանում է որպես անձնագիր՝աշխարհին ներկայանալու համար, մեր երկիր բերելով տեխնոլոգիական ոլորտի հանճարների։
ՎիվաՍել-ՄՏՍ-ի գլխավոր տնօրենը տեխնոլոգիական ոլորտով հետաքրքված երիտասարդներին կոչ է արել հավատալ իրենց կարողություններին, գաղափարներին, ստեղծել իրենց ճանապարհը և Հայաստանի անունն ավելի ճանաչելի դարձնել աշխարհում։
Նախարար Հակոբ Արշակյանը հավելել է, որ մարդիկ, ովքեր մեծ հետք են թողել աշխարհում և ստացել այդ մրցանակը, սկսելու պահին ոչ մի բանով առավել չեն եղել այն մարդկանցից և հայ երիտասարդներից, որոնք հիմա են սկսում իրենց ստեղծագործ կյանքը: Նա կոչ է արել, որ բոլոր ոլորտներում՝ սկսած գյուղատնտեսությունից մինչև միկրոէլեկտրոնիկա, չվախենան սխալվելուց և իրականացնեն իրենց գաղափարները։
Հովիկ Մուսայելյանը ներկայացրել է, թե 10 տարիների ընթացքում ովքե՞ր և ի՞նչ գործունեության համար են արժանացել այս մրցանակին։ Նա հայտարարել է, որ հոբելյանական 10-րդ մրցանակակիրը դոկտոր Տակեո Կանադեն է, ով «Origami World» տեսություն հիմնադիրն է, «Վիրտուալ իրականություն» հասկացության ստեղծողը:
Նա Հայաստան կժամանի դեկտեմբերի 3-ին։ Մրցանակը նրան կհանձնի ՀՀ վարչապետ Նիկոլ Փաշինյանը։ Մրցանակաբաշխության շրջանակներում տեղի կունենա Տակեո Կանադեին նվիրված ծրարի մարում։
