«Քոչարյանի դատը մրցակցային է, երբեմն պաշտպանները հաղթում են դատախազներին». Գևորգ Գորգիսյան. ՏԵՍԱՆՅՈՒԹ

Factor.am-ի հարցազրույցը ՀՀ ԱԺ «Լուսավոր Հայաստան» խմբակցության քարտուղար Գևորգ Գորգիսյանի հետ

-Երևանում տեղի է ունենում WCIT համաժողովը։ Ի՞նչ է այն նշանակում Հայաստանի համար։

-Նախ՝ շատ կարևոր է, որ վերջապես մեզ հաջողվել է Հայաստան բերել այդպիսի լայնամասշտաբ միջոցառում։ Դա, առաջին հերթին, հենց տեղական ընկերությունների համար շփումների, նոր կոնտակտներ ձեռք բերելու լայն հարթակ է, որը կարելի է և պետք է ճիշտ օգտագործել։ Եվ ես կարծում եմ՝ դա անում են։ Մյուս կողմից՝ այդ համաշխարհային ֆոնին հասկանալն է, թե մենք ուր ենք հասել, ուր ենք գնում, հասկանալ՝ աշխարհն ուր է գնում, ու նաև այդ ամեն ինչի մեջ Հայաստանը ճիշտ դիրքավորել՝ որպես բարձր տեխնոլոգիաների կրող, բարձր տեխնոլոգիաները որպես առաջնահերթություն դիտարկող պետություն։ Եվ այստեղ մենք կարող ենք համաշխարհային մեծ շուկայում գտնել մեր տեղը։

-Մենք այսօր արդեն կարո՞ղ ենք մրցունակ լինել, թե՞ դրա համար ժամանակ է պետք։

-Որոշ ոլորտներում մենք արդեն մրցունակ ենք։ Բայց ես կարծում եմ, որ դա քիչ է, որովհետև ոլորտն այնքան արագ է զարգանում, այնքան մեծ մարտահրավերներ կան։ Մարդիկ արդեն, նույն այս երկու օրվա աշխատաժողովների ժամանակ, խոսում են և՛ արհեստական բանականությունից, և՛ մարդկային ռեսուրսների արհեստական ուժեղացումից, ընդհուպ մինչև առանց վարորդների տաքսի ծառայության մեքենաների օգտագործումից։ Այդ ամենի հետ, երբ համեմատում ենք, թե մենք ինչ խնդիրներ ենք լուծում, իհարկե, մեր խնդիրներն էլ վատը չեն, որոնք լուծում ենք, բայց համաշխարհային նորարարություն, որ կգրավի աշխարհը, մենք շատ քիչ ունենք։ Երևի մեկ-երկու ընկերություն նշենք մատների վրա, որ հասել են այդտեղ։ Եվ այս ոլորտում իրապես մեծ թռիչք ապահովելու համար կրթական համակարգն է պետք փոխել։ Երբ ես դեռ այդ ոլորտում էի, երբ աշխատանքի էինք ընդունում մարդկանց, շատ հաճախ ստիպված էինք ընդունել ուսանողների, և մի քանի ամիս, ընդհուպ մի քանի տարի աշխատել նրանց հետ, որպեսզի ձեռք բերեն շուկային հարիր գիտելիքներ և կարողանան լուծել այն խնդիրները, որ դրվում է նրանց առաջ։

-Վազգեն Մանուկյանի գլխավորած «Վերնատուն» ակումբն արձանագրել է, որ Հայաստանի գործերը լավ չեն։ Նրանք արձանագրում են, որ հակառակ սիրո և հանդուրժողականության խոստումներին՝ հանրությանը սևերի ու սպիտակների, մերոնք-ձերոնքի բաժանումը ստեղծել է փոխադարձ ատելության մթնոլորտ։ Այդպե՞ս է, թե՞ ոչ։

-Սև ու սպիտակ բաժանարար գծերի մասին, երևի, ամենաշատը մեր խմբակցություն է խոսել։ Նաև՝ ես։ Մենք այնքան քիչ ենք իրականում, որ նման բաժանարար գծերը շատ վտանգավոր կարող են լինել։ Հեղափոխությունից հետո հատկապես ստեղծվել է մի իրավիճակ, երբ կարող է երկիրը թռիչքաձև զարգանալ, և առանց այդ բաժանարար գծերի մենք կարող ենք հասնել մեծ բարձունքների։ Իսկ երբ մենք սկսում ենք միմյանց մեջ թշնամի տեսնել և ոչ թե ուղղակի մրցակից, այդ պարագայում արդեն խնդիրներն այլ հարթություն են տեղափոխվում, ամեն ինչ նույնիսկ անձնական դաշտ է մտնում, ինչի ականատեսը վերջերս եղանք, և մարդիկ քաղաքական բանավեճը վերածում են միջանձնային, ընդհուպ մինչև ատելության խոսքի։ Մինչև հայհոյանքի կարող են հասնել, ինչը, ցավոք, տեսնում ենք։ Որոշ դեպքերում մենք նաև թիրախավորվեցինք որպես սևեր, որոշ դեպերում մեր քաղաքական հարցերը, որոնք չունեին պատասխաններ, ասացին՝ ուրեմն դուք սև եք, եթե մեզ նման հարցեր եք տալիս, բայց այդպես հեռու չենք կարող գնալ։ Որովհետև առողջ քաղաքական դաշտն առաջին հերթին առողջ քաղաքական բանավեճ է, և այդպիսի բանավեճերում են ծնվում առողջ գաղափարները։ Ներքաղաքական շատ բաներ կան, որոնց շուրջ կարող ենք բանավիճել, բայց Հայաստանի առջև ծառացած այնպիսի խնդիրներ կան, որոնց շուրջ պետք է համախմբվել։

-ԱԺ-ում որպես ընդդիմություն կան «Լուսավոր Հայաստանը» և «Բարգավաճ Հայաստանը»։ Արտախորհրդարանական դաշտում ուրվագծվում են ՀՀԿ-ն, ՀՅԴ-ն, ստեղծվել է նոր հասարակական-քաղաքական հարթակ՝ «Վերնատունը»։ Ի՞նչ հարց կարող է լուծել այս ակումբը։

-Չեմ կարող ասել, թե ինչ հարց են իրենք իրենց առաջ դրել, որ պետք է լուծեն, բայց քաղաքական բազմազանությունը դրական է, դա ժողովրդավարության հիմքերից մեկն է։ Ես նույնիսկ ցավում եմ, որ այս խորհրդարանում այսքան քիչ քաղաքական ուժ է ներկայացված։ Փաստորեն, անկախ Հայաստանի պատմության մեջ սա ամենաքիչ քաղաքական ներկայացվածությամբ խորհրդարանն է։ Բայց հեղափոխական իրավիճակում այդ ամենն ընկալելի էր։ Հաջորդ խորհրդարանը, կարծում եմ, այսպիսին չի լինի, և մենք ավելի բազմազանություն կունենանք: Բազմազանությունը բերում է մրցակցության, իսկ մրցակցությունը միշտ բերում է նրան, որ շահում է ժողովուրդը՝ վերջնական շահառուն։ Առողջ մրցակցության պայմաններում միշտ կարող են ծնվել ավելի լավ գաղափարներ։ Եթե մրցակցություն չկա, սկսվում է լճացում։ Մենք դա տեսել ենք ՀՀԿ-ի ժամանակ։

-Հասարակական, քաղաքական, մշակութային և մարզական մի շարք գործիչներ այսօր հայտարարություն են տարածել, որով Ռոբերտ Քոչարյանին հայտարարել են քաղբանտարկյալ։ Դուք քաղբանտարկյալի տարրեր տեսնո՞ւմ եք Ռոբերտ Քոչարյանի կարգավիճակում։

-Բնավ ոչ, որովհետև ամբողջ պրոցեսը գնում է շատ նորմալ, մրցակցային դատավարություն է գնում, որոշ դեպքերում պաշտպանները հաղթում են դատախազներին։ Հետևաբար՝ այս պարագայում խոսք անգամ չի կարող լինել, որ այս գործում քաղբանտարկյալ կա։ Այս պարագայում մենք գիտենք, որ կան բազմաթիվ փաստեր Ռոբերտ Քոչարյանի դեմ, և ոչ միայն Մարտի 1-ի գործով։ Կարծում եմ՝ քաղաքական իշխանություններն ունեն չմիջամտելու կամք:

Հարցազրույցն ամբողջությամբ՝ տեսանյութում:

Մհեր Արշակյան