«Տեղեկատվության ազատության մասին» օրենքի փոփոխման դեմ պետք է լայն պայքար սկսել. Աշոտ Մելիքյան

«Տեղեկատվության ազատության մասին» օրենքը փոխելու անհրաժեշտություն չկա, անհրաժեշտ է ընդամենը լրացումներ և փոփոխություններ կատարել գործող օրենքում. Factor.am- ի հետ զրույցում նման կարծիք հայտնեց Խոսքի ազատության պաշտպանության կոմիտեի նախագահ Աշոտ Մելիքյանը:

«Մեզ համար ի սկզբանե անհասկանալի էր, թե կառավարության և նախագիծը հեղինակած Արդարադատության նախարարության համար ինչով է վատ գործող օրենքը, որ մշակվեց նոր օրենքի հայեցակարգ»,- նշեց Աշոտ Մելիքյանը:

Մեր զրուցակիցը հիշեցրեց՝ օրենքի նախագծի մի տարբերակ Արդարադատության նախարարության կողմից պաշտոնապես դրվել էր շրջանառության մեջ, դրա հետ կապված մի քանի անգամ քննարկումներ են կազմակերպվել: «Վերջերս էլ մեր ձեռքում հայտնվեց մի տարբերակ, որը, ըստ Արդարադատության նախարարության, սևագիր տարբերակ է: Հիմա , եթե դա նախատեսված չէր քննարկման համար, ուրեմն նախարարությունը պետք է այնպես աներ, որ դա մնար իր պատերի ներսում»,- նկատեց Մելիքյանը՝ ընդգծելով, որ օրենքի նախագծում տեղ գտած մի շարք սկզբունքներ առհասարակ անհամատեղելի են տեղեկատվություն ստանալու ազատության հետ:

Ինչ վերաբերում է նախարարության կողմից հնչեցված պնդումներին, թե օրենքը փոխվում է նաև քաղաքացիական հասարակության պահանջով, Աշոտ Մելիքյանը հակադարձեց. «Եթե Արդարադատության նախարարության համար մեկ հասարակական կազմակերպության նախաձեռնությունը քաղհասարակության նախաձեռնություն է, կարծում եմ՝ դա սխալ մոտեցում է»:

Աշոտ Մելիքյանն անձամբ է ճշտել լրագրողական կազմակերպություններից և վստահեցնում է՝ նրանցից որևէ մեկը օրենքը փոխելու առաջարկ չի արել: «Գուցե Արդարադատության նախարարությունը, ասելով քաղաքացիական հասարակություն, նկատի ունի Ինֆորմացիայի ազատության կենտրոնը: Այնտեղից գուցե այդպիսի առաջարկություն եղել է, որը, իհարկե, վիճելի է»,- շարունակեց Խոսքի ազատության պաշտպանության կոմիտեի նախագահը:

Նրա գնահատմամբ՝ եթե օրենքի նախագծում տեղ գտած դրույթները պահպանվեն, ապա այն կդառնա ռեգրեսիվ օրենք: Աշոտ Մելիքյանը պնդում է՝ գործընթացը պետք է կասեցնել և նախագիծը շրջանառությունից հանել:

Հարցազրույցն ամբողջությամբ՝ տեսանյութում:

Շողիկ Գալստյան