19.12.2025 | 23:07
Պետությունը շարունակելու է աշխատանքներ իրականացնել սոցբնակարանային ֆոնդի ընդլայնման ուղղությամբ. ԱՍՀ նախարար
«Անկախությունից հետո ՀՀ-ն կորցրեց իր բնակչության շուրջ 1 մլն-ը». միգրացիոն ծառայության ներկայացուցիչ. ՏԵՍԱՆՅՈՒԹ
Հասարակություն
02.10.2019 | 12:31
Անկախությունից հետո Հայաստանը կորցրեց իր բնակչության 800 հազարից 1 միլիոնը: Մշտական միգրացիան դադարեցնելու համար համակարգային փոփոխություններ են պետք: Այս մասին այսօր՝ «Հայաստանի սոցիալ-ժողովրդագրական վիճակի բարելավման հիմնախնդիրներն ու ռազմավարությունը» թեմայով քննարկման ընթացքում նշեց ՀՀ տարածքային կառավարման և ենթակառուցվածքերի նախարարության միգրացիոն ծառայության պետի տեղակալ Իրինա Դավթյանը:
«Բարեբախտաբար, մշտական հոսքը թուլացել է և կարող ենք ասել, որ վերջին 7-8 տարիներին Հայաստանին ավելի բնորոշ է սեզոնային աշխատանքային միգրացիան։ Այդ հոսքը գերազանցապես ուղղված է ՌԴ, խոսքը 94-95%-ի մասին է։ Դրանք այն քաղաքացիներն են, որոնք տարվա մեջ առնվազն 5-8 ամիս դրսում աշխատելով են անցկացնում»,- ընդգծեց Իրինա Դավթյանը։
Ըստ նրա՝ Հեղափոխությունից հետո վիճակը բարելավվում է, և հույս կա, որ թիվը գնալով կնվազի: «Մշտական էմիգրացիան կախված է այնպիսի գործոններից, որոնց թվում են աշխատատեղերի բացակայությունը, ցածր վարձատրությունը։ Երկրում պիտի համակարգային փոփոխություններ լինեն, այսինքն՝ փոխվի տնտեսական վիճակը, աշխատատեղեր բացվեն, կենսամակարդակը բարձրանա։ Սա զուտ միգրացիոն հիմնախնդիր չէ։ Միգրացիան այս ամենի հետևանքների կրողն է»։
Միգրացիոն ծառայության պետի տեղակալը հավելեց, որ առաջիկայում պատրաստվում են Կառավարություն պիլոտային ծրագիր ներկայացնել, ինչի արդյունքում կկարողանան այլ երկրներ մեկնած և Հայաստան վերադարձած ՀՀ քաղաքացիներին որոշ օգնություն տրամադրել։
Մանրամասները՝ տեսանյութում։
Նելլի Մելքոնյան
